Kan thawhchhuah nghal a ngai - Inzaghi

Inter Milan manager Simone Inzaghi chuan tun hnaia an chak lohna aṭangin insiamṭhat nghal an ngai tih a sawi - Pathianni zana Venezia nen Serie A match an khelh hunah chak ngei an tum dawn tihna a ni.

Italian Super Cup-ah Inter hian an hmelma AC Milan an ngam lo a, nomawi chawi loh bakah Milan hneh loh hi fans lamin an la na, chuvangin league lama result neih ṭhat nghal chu Inzaghi leh a thawhpui te tana tihmakmawh a ni ngei ang.

Inter manager Inzaghi chuan, "Player hliam kan neih tam avangin kan duh ang thlapin kan inrem thei lo, chutihrualin a inkhel thei ten Inter Milan aiawhtu an nih chuan chak tumin an bei tur a ni.

"Club lian chuan player ṭha tam tak kan kawl, vawi khatah an lut vek seng lo. Tun ṭumah pawh hian Venezia lakah player 11 chauhin bul an ṭan leh dawn, chumi tur chu kan nei ṭha tawk.

"Kan chak lohna aṭanga thawh leh nghal kan tum tur a ni, kan tho chhuak nghal a nih loh chuan midangin min tlansan leh mai ang, chuvangin kan kalsan tawh lam aiin lo la thleng tur atana inbuatsaih a ngai," tiin a sawi.

Tun hnai thla hnih chhung chu hliam vangin Benjamin Pavard leh Francesco Acerbi te an chhawr thei lo a, Super Cup final an khelh ṭumin Stefan de Vrij chuan hliam tuarin Yann Bisseck erawhin Venezia an hmachhawn theih a rinawm.

Midfielder ṭha Hakan Calhanoglu dinhmun a chiang lo mek bawk a, season chawhnu lam inum boruak san lai takin hliam vangin Inter Milan an buai mek tihna a ni a, an nomawi humhim tur chuan hna a hautak dawn hle tihna a ni.