Ka hun tawn hrehawm ber a ni - Swiatek

Damdawi hman phal loh chungchangah buaina a nei a, tennis khel thei loa hrem a nih hun lai chu a hun tawn tawh zinga hrehawm ber a nih thu Iga Swiatek chuan a sawi chhuak.

Season hmasa tawp lamah khan Swiatek hi Asia rama tennis inelna ho aṭangin a inhnukdawk vek a, a hunlai chuan mimal harsatna tia sawi a ni, tun hnuah thla khat chhung inkhel thei loa an hrem vang niin an sawi thung.

World number 2 Swaitek chuan, "Thil thleng kha kei chuan ka hrethiam lo a, dan phal loh thil ka ti tih pawh ka inhre lo, min barakhaih em em a ni, sawi ngaihna pawh ka hre lo zawk hial.

"A nihna takah chuan ka hriat aṭanga chawlhkar hmasa pathum chhung kha chu awm dan pawh ka thiam lo, engtiangin nge min hrem dawn tih pawh kha ka hrethiam lo, ka hun tawn tawh zinga hrehawm ber chu a ni.

"Thil engkim mai kha ka thunun theih vek a ni bik lo a, ka chunga lo thleng kha harsa ti chung pawha ka pawm thiam a ngai," tiin a sawi a, tunah chuan tournament khel turin a inpeih tih a sawi.

Kar hmasa khan United Cup-ah Swiatek hi an ram Poland tan a inlan a, singles match khelin final-ah Coco Gauff chu 6-4, 6-4 in a hneh lo, chak lo mah se a tan Grand Slam khel tura inbuatsaihna ṭha tak a nih thu a sawi.

Pathianni aṭangin Australian Open an khel ṭan dawn a, seeded pahnihna Swiatek hian a match hmasa ber atan January 13, Thawhṭanni hian Katerina Siniakova a hmachhawn ang.