Dyche-a chhuahsan Everton an chak

Everton chuan an manager Sean Dyche an ban aṭanga darkar tam pawh a liam hmain Peterborough nen FA Cup third round an khel a, League One club lakah hian 2-0 in hnehna an chang.

Goodison Park-a inkhelah Portuguese striker Beto chuan chawlhlawk hma hretin goal hmahruai a khung a, hun tawp dawnah Iliman Ndiaye chuan goal hnihna leh chak nemnghehna ni bawk chu a khung ve bawk a ni.

Everton hian match an khelh hma darkar thum chauh a la awm tihah an manager Dyche an ban thu an puang a, under 18 coach Leighton Baines leh captain Seamus Coleman te chuan team enkawl hna an thawk lailawk.

Beisei angin Everton hian season an hmang ṭha tawk lo - Premier League match 19 an khelh aṭangin point 17 chauh an la hmu a, league table-ah 16-na niin, an khelh hmabakah hnehna chang pawh ni se an chunga awm Crystal Palace an la um phak thei rih lo.

Coach Dyche an ban a, boruak danglam neih an beisei - FA Cup lama an result ṭha hi league lamah pawh chhawm nun an duh ngei ang.