Ramsanga'n bronze a hlawh leh ta

C. Lalramsanga'n badminton khawvelah hming a chher zel - kum 2025 chu medal bawkin bul a ṭan leh ta a, Durtlang rawlthar hian Yonex-Sunrise All India Junior Ranking Badminton Tournament 2025-ah bronze medal a vaw chhuak.

Mizo shuttler zinga hmabak êng ber pawla chhal ngam Ramsanga hian tun season kal mekah medal 13 a hlap chhuahna a ni tawh a, heng zinga pali chu international level inelnaa a lak niin, national level-ah medal panga, northeast inelnaah medal pahnih leh state level-ah medal pahnihte a la bawk - uanpui tham a ni.

Doubles 'Specialist'

All India Junior Ranking Badminton Tournament hi January 3 aṭang khan inelna neih ṭan niin, January 10, Zirtawpni khan an khar a, Hyderabad-a inelna neihah Mission Veng Badminton Club player Ramsanga hi boy's doubles category-ah a inlan.

Ramsanga hi mixed doubles nen he inelnaah hian inlan kawp turin a inbuatsaih a, mahse, a partner a inhliam avangin boy's doubles-ah chauh a inlan thei - a inlanna awmchhunah medal a hlap chhuak ta tho.

Medal kalkawng

Ramsanga hi Bjorn Jaison nen ṭangdunin, seeded no 8-na an ni a, hei vâng hian round of 32 aṭangin bul an ṭan a, an match hmasa berah Divyam Kejriwal leh Bapun Rout-te inkawp chu 21-14, 21-16 in an hneh.

Second round-ah Ramsanga leh Jaison te hian Mizo rawlthar tho Malsawmhlua leh Amarjit Singh inkawp chu tawngin, 21-12, 21-17 in an hneh a, quarterfinal-ah seeded no. 3 Niranjaan G.N leh Vishvajit Raj LVN-te chu deciding game-ah 20-22, 21-15, 21-11 in an hneh thei.

A thlawn mai maw

Ramsanga te ṭhiandunin final lut turin beiseina sang tak nei mah se, semifinal-ah seeded no. 1 Bhavya Chhabra leh Param Choudhary-te ṭangdun an hmachhawn a, uiawm takin 15-21, 24-26 in an tlawm.

Khawvel huap pawha badminton thiam ram India rama rawlthar rual zingah Ramsanga hming a langsar ṭhin - season hman mekah international bronze medal (4), national gold (2) leh bronze (3), northeast gold (1) leh silver (1) bakah state championship-ah gold (1) leh silver (1) a la a, a kum zat ngaihtuahin a sulhnu hi a hraw rem rem hle.

Mizo an mawi

Mizoram Badminton Association, NEIDA leh Tata Trusts thawhhona a zarah Mizoram badminton-in hma a sawn zel a, tun inelnaah pawh Mizo inlan an awm nual a, main draw khel phak engemaw zat an awm a ni.

Lalrempuii chuan Tanoo Chandra ṭanpuiin, a kawppui nen hian girl's doubles-ah round of 8 an thleng a, Sainunmawia Sailo leh Ishita Negi-te pawh ṭangdunin, mixed doubles-ah round of 16 an thleng ve bawk. MBA chuan thuchhuah siamin, "Ramsanga leh Mizo shuttler dangte, chawimawina sang zawk dawng zel turin duhsakna kan hlan a ni," an ti.