Kolkata derby-ah Bagan an chak

Inrinni zan khan Guwahati khawpuiah Kolkata derby khelh a ni a, Mohun Bagan chuan 1-0 in East Bengal an hneh - Jamie Maclaren chuan inkhela goal awmchhun hi a khung a, East Bengal-in a chhanletna tur an nei lo.

Bagan-in hnehna an chan avangin ISL table chung bera an dinhmun an sawhnghet zel a, league match 15 an khelh tawhah point 35 an nei mek - an hnuai chiaha awm Bengaluru aiin point riatin an sang tawh zawk.

Guwahati lamah...

ISL-ah Kolkata derby-in entu an ngah ṭhin a, mahse, ṭum dang angin Kolkata khawpuiah neih theih a ni lo. Gangasagar Mela hman mek a ni a, hei vang hian Police lamin venhimna an beisei ang an pek theih loh thu an hrilh.

Derby boruak a sosan ṭhin avangin thuneitu lam tan Police tam zawk venhimna tel loa inelna thlen chi a ni lo a, Inrinni zan inkhel hi Bagan tan 'home game' ang niin, Bagan hian Guwahati khawpuia khelh an thlang.

Derby chu le

Indira Gandhi Athletic Stadium-a inkhelah Bagan hian goal khung turin hun an mamawh rei lo a, Jamie Maclaren chuan minute hnihna lekah a khung nghal - goal dang erawh kan hmu zui lo a, East Bengal player Souvik Chakrabarti chu minute 64-naah a yellow card pahnihna avangin hnawhchhuah a ni zui.

Kim loa khel East Bengal tan thawh leh a harsa tawh a, Guwahati khawpuiah an tlawm. He inkhelah hian Bagan tan Lalengmawia Ralte (Apuia) chuan minute 90 a khel tluan a, East Bengal tan defender Lalchungnunga leh striker David Lalhlansanga ten bul an ṭan.

Mohammedan an chak

Match 11 zet a zawna an chak zawh tawh loh hnuah Mohammedan SC an chak a, Inrinni zan khan Bengaluru FC chu 1-0 in an hneh - hun tawp nan minute hnih chiah a awm tawh tihah Mirjalol Kasimov chuan inkhela goal awmchhun a khung.

Mohammedan tan Zodingliana Tochhawng, Joe Zoherliana, Vanlalzuidika Chhakchhuak leh Lalremsanga Fanai ten inkhel bul an ṭan a, Bengaluru tan Lalremtluanga Fanai chuan bul a ṭan ve bawk. Zirtawpni zan khan NorthEast United leh Punjab FC chu 1-1 in an inhnehtawk a, Highlander tana Alaaeddine Ajaraie goal hmahruai chu Punjab tan Khaiminthang Lhungdim chuan a sut.

#January 13, Thawhṭanni Zan
Kerala Blasters 7:30 PM Odisha FC