Goal riat nen Manchester City an tho

Manchester City-in kum hlui mangchhia an mang ṭha ṭan a, kum tharah inrintawkna an nei let. Pep Guariola hoten Premier League-a West Ham 4-1 a an sawp hnuin FA Cup third round-ah Salford City 8-0 in an sawp. Jack Grealish-a'n kum khat chuang goal a khung loh hnuah goal a khung leh tawh a, January 2019 hnua an chak chian ber a ni bawk.

Etihad Stadium-a inkhelah hian James McAtee-a'n hattrick a siam a, Jeremy Doku-a'n goal hnih a khung bakah Divin Mubama, Nico O'Reilly leh Grealish ten goal khat ṭheuh an khung. City-in player pawimawh Erling Haaland, Bernardo Silva leh Josko Gvardiol te dah ṭha chungin hnehna an chang chiang hle.

Mual sir aṭangin

Pep Guardiola-a'n player ṭha ṭhenkhat awltir mah se bul ṭantu zingah Savinho leh Jeremy Doku bakah Matheus Nunes leh Jack Grealish te an tel a, ṭan phat aṭangin an goal bawh a na hle.

Man City midfielder Grealish-a'n thiam thil a la theihnghilh lo a, minute riatnaah Grealish-a ball pek ṭha chu Doku-a'n vawi khatah petin goal-ah a lut nghal. Mual vei lam aṭangin an ṭhiat phawt a, minute 20 hnuah mual ding lam aṭangin mawi zetin Salford tlarhnung an ṭhiat.

Savio-a'n Nunes-a um turin ball chhungah ball a pe lut a, Nunes cross chu Mubama-a'n a khung. Kum 20 mi Mubama hian club tana a khelh hmasak berah goal a khung nghal a, English striker hi West Ham academy chhuak niin Hammers tan FA Youth Cup-ah a champion tawh a, 2022–23 season khan West Ham United Young Player of the Year-ah thlan a ni.

Team pahnih an inthlau a, Salford tan dan an harsa. Dinglamah Doku a che ṭha zel a, a ball pek chu O'Reilly-a'n a khung. First half-ah 3-0 a ni a, chak tur a chiang tawh. Man United player hlui 'Class of 92' te enkawl Salford tan thawhchhuah a beiseiawm tawh loh.

A goal ta

Jack Grealish hian nikum chhung zawng khan Manchester City tan goal a khung lo a, kum khat chuang goal a khung tawh loh avangin team tan a ṭangkai nep a, inrintawkna a hloh bawk.

Salford an hmachhawn ṭum pawh hian Grealish hi khel ṭha mah se goal hmaah a hriam lo a, Doku ball pek ṭha bik chu goal-ah pet nghal thei lo mah se penalty a hlawh chhuak hlauh. Minute 49-naah Grealish-a'n goal a khung a, season khelh hma bakah inrintawkna a ngah sawt ang.

Doku pawhin minute 69-naah a penalty hlawhchhuah chu goal-ah a chantir a, hun a tawp lamah erawh James McAtee a langsar ta ber. Man City academy chhuak McAtee hian a pianna khua Salford club lakah zah ngaihna a lantir lo a, hattrick a siam.

McAtee hi kum 22 mi a ni tawh a, Sheffield United-ah loan hmanga chhuak tawhin Blades tan hmun pawimawh a chang pha. Salford lakah McAtee-a'n goal thum a khung a, Guardiola-a'n season chawhnu lamah a chhawr tam hret a rinawm.

City Academy aṭangin Jadon Sancho, Cole Palmer, Morgan Rogers leh Liam Delap te an chhuak a, tun hnaiah an che ṭha hlawm. McAtee hian Premier League-a player chhuak thar langsar ho hi a khelhpui mai lo a, amah hi an captain a ni. Guardiola chuan, "Player danglam bik a ni a, ka lawmpui e," tiin a sawi.