Club lian an chak zo lo
Inrinni zan Serie A inkhelah champion tum ngam zinga team pathum - Atalanta, Juventus leh AC Milan te chu an chak zo lo vek a, point khatah an lungawi a ngai ta a ni.
Udinese lakah Atalanta-in goal an khung thei lo, 0-0 in an inhnehtawk. Inkhel dangah Old Lady leh Torino te 1-1 in an inhnehtawk a; AC Milan pawh an mikhual Cagliari nen goal khat ve ve khungin point an insem ve bawk.
Juventus leh Torino inkhel boruak a sang, minute riatna leka Kenan Yildiz goal khung chu mualneitu lamin chawlhlawk hma chiahin Nikola Vlasic hmangin a sut a, goal dang a lut zui tawh lo.
Second half tir lamah Juventus defender Nicolo Savona chuan Yann Karamoh a titlu a, thil thleng chungchanga inhnial buaina vangin coach pahnih Paolo Vanoli leh Thiago Motta te chu hnawhchhuah an ngai hial, a hnu lamah erawh goal a lut tawh lo.
Juventus coach Thiago Motta chuan, "A bul kan ṭan fuh ang ngeiin goal pawh kan khung hmasa, a hnu lamah erawh Torino kha hmun awl kan pe zau mah mah a, hla tak tak aṭangin ball an inpe fuh thei hle bawk.
"Na taka goal kan nawr loh chuan kan khingpui lam tan kawng kan siamsak mai ṭhin, tun ṭum kan match aṭang hian zirchhuah tur kan ngah hle," a ti a, goal an khung hnua a naute khelh dan chu a duhkhawp lo.
Turin club hian tun season league match 19 an khelh tawhah tlawm an la nei miah lo - Serie A club zinga tlawm lo awmchhun an ni, mahse ṭum 12 ngawt an khingpui nen an inhnehtawk tawh a, point 33 neiin pangana an ni mek.
AC Milan pawhin an duhthusam ang result an hmu bik lo. Counter attack aṭangin Cagliari tan defender Nadir Zortea chuan minute 55-naah a khung a, goal luh aṭanga minute li hnuah Milan striker Alavro Morata chuan a sut a, goal dang kan hmu zui lo.
Milan coach Sergio Conceicao chuan, "Football team enkawl hna hi kum 13 chhung ka thawk tawh, chung hunah chuan tun ṭuma kan match kha first half kan khelh chhiat ber a la ni hialin a rinawm.
"Thil ropui leh hautak tak tak tih kher a ngai lo a, ka beisei bawk hek lo. Mahse, tun ṭumah kha chuan thil awlsam leh harsa lo tak tak pawh kan tidik hleithei tlat lo, ka che muangin kan tlan tam tawk lo bawk," a ti.
Nizan khan Inter Milan an inlan a, an chak a nih chuan match khata khel tlem chungin Atalanta an tlanpel dawn a, champion lai hi an khelh tlemna pahnihah an chak chuan a chung berah an inhlangkai thei dawn a ni.