Bayern leh Leverkusen inum zel

German champion Bayer Leverkusen chuan inkhel hmuhnawmah Borussia Dortmund chu 3-2 in an hneh a, nomawi hum tumin thapui an thawh - Xabi Alonso naute an chak hnuah Bayern Munich an inlan ve leh a, an khingpui Borussia M'gladbach chu 1-0 in an hneh thung.

Bavarians chakna goal awmchhun hi Harry Kane-a'n penalty aṭanga a khung a ni - Bundesliga match 16 aṭanga point 39 hmuin hmahruaitu an ni chhunzawm, anmahni hnaih bertu Leverkusen nen an inkarah point li a awm.

Borussia Park-a inkhelah Vincent Kompany enkawl Bayern Munich lamin ball an chang tamin inkhel pawh an thunun viau, mahse goal khung tur erawhin vanneihna an mamawh, minute 68-naah Michael Olise-a penalty hlawh chhuah chu Kane-a'n a khung.

England captain Kane hian Bundesliga season kal laiah goal 15 a khung tling ta chiah, goal khung tam lamah Eintracht Frankfurt forward Omar Marmoush nen an intluk mek, mimal chawimawina dawng tur zawk rin thiam a la harsa.

Kum 31 mi Kane chuan, "Tun season chu inelna a hautak leh dawn hle, a chhan chu Leverkusen hi team ṭha tak an ni a, kan chesual hlek a nih chuan min rawn umphak nghal mai ang, chuvangin kan tan chetsual a remchang lo," a ti.

Tottenham striker hlui Kane hian champion nomawi duh vangin Bayern Munich a zawm a ni a, mahse season hmasa khan a beisei angin an hlawhtling lo - tun season chu champion an châkna a sang zual, thil awlsam erawh a ni bik lo ang.

Zirtawpni zan khan Signal Iduna Park-ah Bayer Leverkusen an lenglut a, a bul an ṭan ṭhat vangin point thum an hmu. Minute khatna lekah Nathan Tella chuan khung ṭanin, forward Patrik Schick chuan goal hnih dang a belh bawk, minute 20 tlin hmain goal thum an khung hman.

Dortmund tan England Under-21 winger Jamie Gittens leh Serhou Guirassy ten khung ve mah se awmzia a nei phak lo a, khualmualah Alonso leh a nauten point thum hlu tak an hlawh chhuak a ni.

Bundesliga match a khelh hnuhnung paruk aṭanga goal 11 khungtu Schick chuan, "Dortmund tan tute nge khelmual chhungah lut tih kan ngaihtuah lo, a chhan chu keimahni lam khan khelh tum dan nghet tak kan nei sa, chumi ang chuan kan khel," a ti.

Leverkusen midfielder Granit Xhaka pawhin an chunga awm Bayern Munich chu an ngaihtuah loh thu a sawi a, tuna an khelh dan leh hmasawn dan chu a dikin kawng dikah an kal mek tih a sawi ve bawk.