Everton-ah Moyes a kir

Everton chuan Ningani khan Sean Dyche an ban a, a thlakna turin Inrinni khan an manager hlui David Moyes an lalut. Kum 61 mi Moyes hian kum hnih leh a chanve daih contract a ziak.

Toffees hi Premier League table-ah 16-naah an awm mek a, relegation zone aṭangin point khat chauhin an him. Tun season-ah match 19 khel tawhin vawi thum chiah an la chak a, an result a ṭha lo hle.

Moyes chuan, "Everton-ah hian kum 11 chhung hun duhawm tak ka lo hmang tawh a, sawmna ka hmuh khan ka hnar phal lo. Tunah chuan Everton ṭantute zawng zawng puihna kan mamawh a, result ṭha nei tura hmalam zawnga kan kal a ṭul a ni," tiin a sawi.

Scottish manager Moyes hian kum 2002 aṭanga 2013 thleng Everton hi a enkawl a, Goodison Park aṭangin Manchester United chuan Sir Alex Ferguson thlak turin an swm chhuak. Old Trafford-ah hun rei a awm lo a, Moyes hian Real Sociedad leh Sunderland bakah West Ham ṭum hnih a enkawl tawh a ni.

Everton hian Leighton Baines-a kaihruaihnain FA Cup-ah Peterborough chu 2-0 in an hneh a; January 15, Nilaini zan hian Aston Villa nen Premier League-ah an inkhel ang a, Moyes-a'n a enkawl ṭan ang.