Tevez an ramah, Juve-ah Mario?

Italian champion Juventus-in Carlos Tevez cham zel turin an duh a, Argentine forward-in a larchhuahna Boca Juniors lama let a thlang.

Juventus manager general manager Giuseppe Marotta chuan Tevez hi a chhuak a nih chuan a thlak nan Atletico Madrid forward Mario Mandzukic an duh thu a sawi ve bawk.

Boca tan chauh

Tevez hian Juventus-ah kum khat contract a la nei a, Juve general manager sawi dan hmang in a chhuak a nih chuan Boca Juniors-ah bak a chhuak lo ang.

Club general manager Morotta chuan, "Mihring ve tho a ni a, a thutlukna hi kan zah sak a ṭul a ni. Argentina-ah a football career ropui taka hman zawh a duh a ni. Keini chuan cham zel turin kan duh a, mahse a duhthlanna kan ngai pawimawh ber ang," tiin Tevez-a'n an rama kir a duh thu a sawi.

Tevez hian Bianconeri-ah (Juventus koh duatna) June 2016 thleng contract a la nei a, Juventus hian an duh chuan an chelh thei. Amaherawhchu Serie A ṭum hnih champion puitu player tih hnual an tum lo.

Morotta chuan sawi zelin, "An rama a kir dawn a nih chuan man nei loin kan chhuah zalen ang, chutihrualin club dang erawh a zawm lo ang. Europe club dang zawm phei chu a hnai lo. A chhuak dawn a nih chuan Argentina-ah a let dawn," tiin Tevez an chhuah zalen tur thu a sawi. Hetihlai hian media ṭhenkhat tarlan dan chuan Juventus hian Tevez-a manah hian euro maktaduai 5 an chhiar niin an tarlang ve bawk.

Kum 31-a upa Tevez hian Juve tana a season khatnaah goal 19 a khung a, season liamta khan goal 20 a khung a, Argentina tana khel turin koh a ni leh ta bawk.

Tevez hian kum 2001 khan Boca Juniors-ah bul a ṭan a, kum thum chhungin match 75 khelin goal 26 a khung. Hemi zawh hian Corinthians, West Ham United, Manchester United leh Manchester City tan a khel zui.

Mario a nghet lo

Juventus hotu lamin langsar takin Mario Mandzukic an duhthu an sawi chhuak a, Atletico Madrid coach Diego Simeone pawhin Croatian forward chelh chu a thuneihna bak a nih thu a sawi.

Argentine manager chuan, "Club aṭanga chhuak tur leh lut tur chungchang hi chu club thuneihna a ni. Club-in thutlukna ṭha ber chu an siam ang. Kan club-ah hian khawih chet theih loh Koke, Godin leh player ṭhenkhat hi chu an awm, chu zawng chu ka sawi theih chu a ni," tiin tih theih a neih loh thu a sawi.