MBBA Season Opening Final Vawiin tlai dar 5:00-ah MSL1 Final Rematch

Mizoram Super League final thlir turin Hawla Indoor Stadium leng lo an pungkhawm a, final-a inhmachhawn Khatla TBL leh Zarkawt BCA te khan vawiin tlai dar 5:00 hian a hmun ngaiah MBBA Season Opening final-ah an intum leh dawn.

Inkhel en man hi Rs 20 a ni dawn a, MSL aiin en man a tlawm zawk a, chutichung chuan entu an tlem zawk ang a, chutihrualin inkhel erawh a hmuhnawm ang.

TBL ṭha zawk

MSL champion Khatla TBL-in final thleng turin Chanmari Ballers Mansion, Dawrpui VT SC, Dawrpui Aces leh Mission Veng Vikings te an hneh.

Inelna tir lamah Khatla TBL player-te an kim lo. MSL1 champion an chak chho zel a, TBL an ṭha tial tial. Final-ah hian player pawimawh zingah captain Vanlalnunsanga chiah a tel dawn lo.

TBL hian player thar an la lut lo a, inelna ṭan tirhah an kim lo. Chutichung chuan MSL ṭan hnuah Zarkawt Serpents chauh lo chu TBL hneh thei an awm lo.

Semifinal-a MSL club Mission Veng Vikings an hneh ṭumin starting lineup-ah H. Laldinsanga, Lalrinzuala, Gospel Lalthawmmawia, Vanlalmuana leh Malsawmtluanga Sailo te an hmang a, coach Mapuia chuan final-ah a danglam loh thu Vanglaini palai a hrilh.

MSL1 MVP Mapuia chuan, "Season Opening Tournament hi tun season bul ṭanna a ni a, 'a bul ṭan ṭhat chu a chanve zo' an tih ang chiah khan team boruak ti ṭha turin champion nghal hi a pawimawh takzet. MSL aiin kan inpuahchahna chu a ṭha lo hret a, amaherawhchu kan team erawh tlak hniamna ka hmu lo. Champion ngei tumin theihtawp kan chhuah ang," tiin a sawi.

BCA an inpeih

Zarkawt BCA-in Simon Lalremruata leh PC Lalmuansanga (Mama) te an ziak lut thar. Power forward pahnih te zarah Lalsawmtluanga, HT Vanlalremruata, David Lalruatfela, R. Lalfakawma leh Zorinsanga te awm loh a hriat lo a, final luhna kawnga player pawimawh Simon hi captain a ni nghal.

BCA-in final thleng turin Mis­chieves, Aizawl Venglai, Zarkawt Serpents leh Chawnpui VR4 te an hneh a, an khingpuite hi an sawp em em vek.

BCA coach Lalruatfela (Afela) chuan, "Kan player senior player-te an awm loh avangin MSL aiin kan ṭha zawk chu ka ti ngam lo. Amaherawhchu media lam aṭangin pressure kan nei tlem a, MSL aiin kan khel ṭha zawk," tiin a sawi.

Zarkawt club hian semifinal-ah Michael F. Lalawmpuia, Paul Van­lalnghaka, Henry Lalramngaih­awma, Dennis Lalmuanpuia leh Simon te starting five-ah an hmang a; Jackson Lalrintluanga, Mama, Albert Lalram­chuana leh Remsanga te an neih avangin bench pawh an nei chhah ṭha hle.

BCA boss Afela chuan, "TBL hi an ṭhat loh lai niin ka hria a, an hlauhawm loh lai ber a ni. Kan tan chuan TBL hnehna hun ṭha a ni," tiin champion a inbeisei hle.

Final Kalkawng

KHATLA TBL

Last 32

TBL - Chanmari Ballers Mansion

Last 16

TBL - Dawrpui VT SC

Quarterfinal

TBL 98-38 Dawrpui Aces

Semifinal

TBL 80-75 Mission Veng Vikings

ZARKAWT BCA

Last 32

BCA 70 - 52 Mischieves

Last 16

BCA - Aizawl Venglai

Quarterfinal

BCA 91-54 Zarkawt Serpents

Semifinal

BCA 84-55 Chawnpui VR4