Schweini tan United a ṭha - Matthaus
1990 FIFA World Cup-a Germany champion puitu Lothar Matthaus chuan 2014 FIFA World Cup champion Germany player pawimawh Bastian Schweinsteiger chu Pep Guardiola hnuaiah hmun pawimawh a chang pha loah ngaiin Manchester United pan turin thurawn a pe.
Bayern player hlui Matthaus chuan, "Schweinsteiger-a'n a hmalam hun a ngaihtuah hi a mak lo. Bastian hian kum 2018 thleng chu a ṭha thei ang bera khelh a duh a, amaherawhchu tunhnaia Bayern-in an chhawr dan thlir hi chuan a theih loh tih ka chiang," tiin khelhna hmun a chan tam tawk loh thu a sawi.
Matthaus chuan, "Midfield khaikhawm turin Bastian hi a ṭha tawk a, amaherawhchu Juventus-a Andrea Pirlo an chhawr anga an rin ngam a ṭul. Mahse Pep Guardiola-a'n Spanish midfielder Xabi Alonso a ring zawk a, Thiago leh Javi Martinez te an dam ṭhat phei chuan inkhel pawimawhah a lut pha tawh lo ang," a ti.
United tana khelh sawi mawiin Germany legend chuan, "USA-ah a kal a nih chuan nakkuma European Championship-ah ram tan a khel phak kher lo ang. Chuvangin thuthang hi a dik a nih chuan Manchester United sawmna a pawm mai hi atan a ṭha a ni. Van Gaal hian a duh a nih chuan a ṭhatna tak position-ah a dah ang," a ti.
Schweini hian Birmingham-a khelh mek Aegon Classic-ah a bialnu Ana Ivanovic a ṭawiawm a, mahse Serbian star hian second round-ah Michelle Larcher de Brito hneh loin Nilaini khan a tla.