Ace record siamtu Lisicki

Wimbledon inbuatsaih nan grass court tournament hrang hrang khelh mek zel a ni a, Nilaini khan Sabine Lisicki chuan Aegon Classic-ah hmeichhe zinga match khata ace vawchhuak hnem ber record a siam.

Kum 2013 Wimbledon finalist Lisicki hian second round-a a khingpui Belinda Bencic lakah set hnih chhungin ace vawi 27 vawchhuakin 6-1, 7-6 (7-4) in hnehna a chang.

Birmingham a inkhel­ah hian Lisicki hian set khatnaah vawi 16 zet ace a vuakchhuah bakah set hnihnaah vawi 11 a vawchhuak leh bawk. American Serena Williams-i'n kum 2012 Wimbledon a vawi 24 a lo siam tawh leh Estonia Kaia Kanepi-i'n Tokyo a kum 2008-a match khata vawi 24 ace an siam tawh chu a rawn khum ta a ni.

Record thar siamtu Lisicki chuan, "England-a inkhelh nuam ka tih chhan chu grass a kan inkhel ṭhin hi a ni. A chhan ber pawh na tak taka ball a vuak theih vang a ni bawk. Record ka siam thei hi ka lawm a, a pawimawh ber zawk chu Aegon Classic-a champion leh Wimbledon a ṭha taka khelh a ni ang," tiin a sawi.

Inkhel dangah cham­pion lai Ana Ivanovic chu seeded pangana Michelle Larcher De Brito lakah 6-4 3-6, 7-6 (8-6) in a tlawm. Hmeichhe World number 1 pawh lo ni tawh Victoria Aza­renka chu a ke na vangin he tournament aṭang hian a inhnukdawk bawk.