Hrem lohin Vidal a chhuak

Juventus leh Chile midfielder Arturo Vidal chu a car chetsual laia zu rim a nam vanga man a nih hnuin chhuah zalen a ni.

Copa America khelh meka top scorer ni lai Vidal hi Thawhlehni khan Chile khawpui Santiago-ah a Ferrari car-in a chesual a, hliam na tuar lo mah se zu rim a nam avangin ploice-in an man a ni.

Kum 28-a upa midfiel­der hi a driving licence tih tawp lailawk a ni a, Chile team-ah erawh a la khelh chhunzawm zel dawn.

Police kut aṭanga chhuah a nih hlim hian Vidal chuan, "Ka chunga rinna nghat tu zawng zawng te hnual takin ka siam a ni," tiin mittui parawl chungin a sawi a, a inthiamlo hle.

Chile coach Jorge Sampaoli chuan Vidal-a tawhsual tawh chungchanga mi tam tak chet dan chu ṭul lo a tih thu sawiin, "Mi ṭhenkhatin uchuak taka thil pawi tawpkhawk anga an sawi hi a ni lem lo. Chile squad-ah pawh Vidal hi awm tir zel turin thutlukna kan siam a ni," a ti.

Media ṭhenkhatin an report dan chuan Vidal hian car-a a chetsual lai hian a nupui Maria Teresa Matus a phur nia sawi a ni a, pawisa khelhna hmun Casino aṭanga an haw lam a ni nghe nghe.

Vanneithlak takin Vidal te nupa hian hliam na an tuar lo hlauh a ni.

Vidal mantu zinga mi police colonel Ricardo Gonzalez chuan Juventus midfielder hian a accident lai hian zu rim a nam ngei thu a lo sawi tawh a, a zu in zat erawh tarlan a ni lo.

Chilean midfielder chuan an tawhsual tawh chu a thiam loh vang a nih loh thu sawiin, "Ka thiam loh a ni lo. Kei leh ka chhungte kan ṭha a, mi in ngaihsaknaah lawmthu ka sawi takmeuh a ni," a ti.

Italian club Juventus tana khel mek Vidal hi Italy-a a kir leh hunah Milan khawpuia Chile consulate-ah thla tin a in report a ngai dawn a ni.