Hmeichhe World Cup Hneh loh la tawng lo Brazil an tlang

Ningani zing hmeichhe World Cup inkhelah Brazil-in Costa Rica 1-0 in an a hneh a, group stage-ah hneh loh tawng lo in second round an lut.

A vawi khat nana hmeichhe World Cup nomawi chawi ngei tum Brazil-in goal an khung thei lawk lo, goal inpe loin inkhel an ṭin mai dawn emaw tih hnuah Raquel Fernandes chuan Brazil tan goal a rawn khung a, hun tawp nan minute sarih chiah a awm tawh avangin Costa Rica tan sutna hun a awm tawh lo. 1-0 in Brazil an chak.

Brazil hian second round-ah Australia an tum dawn a ni.

A vawi khat nan

last 16-ah South Korea

South Korea hmeichhe team-in ṭum danga an tih theih ngai loh an ti a, World Cup second round lut turin si khat an phurh hmasak zet hnuah 2-1 in Spain an lehthal.

Spain tan captain Veronica Boquete-i'n first half-ah goal hmahruai a khung a, mahse chawlhlawk hman zawh hnuah South Korea tan Cho So-hyun leh Kim Soo-yun te'n an sut avangin chak zawkah Korean hmeichhe team an ṭang.

South Korea hian second round-ah France an hma­chhawn ang.

Bul ṭan ṭha lo England an tlang

England-in an match hma­sa berah France hneh lo mah se a hnuhnung pahnihah an khingpuite an hneh ve ve avangin second round an lut.

Ningani zingah England-in Colombia hmeichhe team an hmachhawn a, inkhel ṭan aṭanga minute 15-na lekah England tan Karen Carney chuan an hmahruaina goal khungin Fara Williams chuan penalty-in a rawn chhunzawm ve leh. Minute 38 naa Fara goal hi a international goal 38-na chiah a ni. Colombia tan Lady Andrade chuan injury time-ah goal rawn khung ve mah se awmzia a nei thui tawh lo a, 2-1 in England an chak.

England hian second round-ah Norway an tum dawn a ni.

Mexico hmeichhe team 5-0 a sawptu France chu England awmna group F aṭanga second round lut ve dang an ni.