Referee laka che mawi lo Dempsey
USA captain Clint Dempsey chu a team khelh mekna MLS club Seattle Sounders leh Portland Timbers te US Open Cup-a an inkhelh ṭumin referee lakah a che mawi lo a, a chet dan hian sawi zui a hlawh hle.
Fulham player hlui Dempsey hian referee Daniel Radford-a'n a team mate Michael Azira a hnawhchhuah avangin referee ken lai lekhabute chu pawhthlak sakin a pawtchhia a ni.
He inkhelah hian Azira red card hmuh hma in Seattle Sounders player tho Brad Evans chu hnawhchhuah a lo ni tawh a, an team zinga player pahnih hnawhchhuah an ni hi Dempsey hian hrethiam loin mawi lo takin a che ta a ni. Kum 32-a upa forward hi hnawhchhuah chhunzawm ve nghal a ni nghe nghe.
He inkhelah hian Inter Milan striker hlui leh Seattle tana khel mek Obafemi Martins chu hliam vangin lakchhuah a ni bawk a, substitution an lo hman zawh tawh si avangin player pasarihin an khel tluan. Inkhel a tawp meuh chuan 1-3 in Seattle hi a tlawm zawkah an ṭang a ni.
Red card a hmuh hnu hian US tana match 112 khel tawh Dempsey hi a team mate te'n an beng daih ngai hial khawpin a thinrim a, a chhuah pahin assistant referee hmai zawnah tih el pahin kut a beng bawk a ni.
Tottenham tan pawha lo khel tawh Dempsey hi hetiang taka mawi loa a chet hi tunhmain sawi tur a la awm ngai lo.