Tennis lal thar a piang A hmingah Dominic Thiem

Beiseina leh rinna hi tumruhnain a zui chuan hlawhtlinna a lo thleng ṭhin. Dominic Thiem-a'n a ṭhianpa Alexander Zverev hnehin US Open 2020 nomawi a chawi a, Austrian star tan Grand Slam title hmasa ber a ni.

Thawhṭanni zing final hmuhnawm takah seeded pahnihna Thiem hian darkar li leh minute khat chhungin 2-6, 4-6, 6-4, 6-3, 7-6 in hnehna a chang. Nomawi a chawi hnuah Thiem chuan Grand Slam champion nih chu a thil tum ber a nih thu a sawi chhuak.

Hnehna changtu Thiem chuan, "Theih nise chuan kan pahnih hian champion ila ka duh," tiin Zverev pawhin nomawi chawi a phu nia a hriat thu a sawi. Open Era chinah Austrian tlangval hi set hnih hloh hnua US Open chawi thei hmasa ber a ni hial.

Arthur Ashe Stadium, New York-a inkhelah Zverev-a'n base line aṭangin unforced erorrs nei nghal mah se a service na tak hmangin a che fuh hmasa zawk a ni tho. German tlangval hian harsa lutuk loin set hmasa pahnih a la fel der!

Kum 23 mi Zverev hian Grand Slam final a khelh vawi khatna a ni a, beisei aiin boruak a ngam. Set thumna aṭang erawhin Thiem a rawn inlar, Austrian star hian set hnuhnung pathum la zawnin boruak a thlak danglam chiang hle.

Thiem-a'n set point a hmuh hnuah Zverev a talbuai, ball vuak dik theih tur nia ngaih chu backhand hmanga vaw dik loin, a tihsual vangin point hnuhnung ber chu a khingpui lakah a pe; championship point boruak kha atan a rit tih a lang.

Kum 27 mi Thiem hian tun hmain Grand Slam final vawi thum a khel tawh, French Open final-ah Rafael Nadal vawi hnih a hneh lo a, kumin tir lama khelh Australian Open final-ah Novak Djokovic a ngam 

lo bawk.

US Open final an khelh hma khan Thiem chuan, "Ka chak lo leh a nih chuan Andy Murray ka be rawn mai thei," tiin fiamthuin a sawi. Murray hian Grand Slam nomawi hmasa ber a chawi hmain final a khelh hmasak paliah a chak lo vek, a hnuah erawh hlawhtlinna a chang a ni.

Tun hnaiah Roger Federer, Rafael Nadal leh Novak Djokovic ten Grand Slam nomawi an insem mai ṭhin a, tun ṭumah hian player ropui pahnih an inlan loh bakah Djokovic a tla hma a, 2016 hnu lama a vawi khat nan 'Big Three' pawnlam ami an champion ve ta.

Mihring tu pawhin nih tum, nih chak leh hmathlir kan nei vek. Dominic Thiem tan chuan Grand Slam champion nih chu a thil tum ber a ni a, tennis nomawi lian chawi aia chak leh ngaihhlut dang a nei lo tihna a ni.

Thiem chuan, "Ka thil tum chu a hlawhtling ta, hun rei tak chhung chu hetiang hun a lo thlen theih nan hian ka nghak. Grand Slam pali zinga pakhat tal ka lak ve theih nan hian ka nun pumpui hi ka hlan, a tawpah chuan a lo thleng dik.

"Hlawhtlinna hi mahni maia chan theih a ni lo a, hetiang dinhmun ka thlen theih nana min puitu ka chhungte leh ka team chungah lawmthu ka sawi. Ka hun hmasa leh bul ṭan dan ka ngaihtuah let hian an chungah ka lawm takzet," a ti.

A duh tak US Open nomawi la chawi thei lo mah se Alexander Zverev a la beidawng lo, a chak loh hnuah German tlangval hian engtik niah emaw chuan atan hun ṭha a la her chhuah ve leh ngei a beisei thu a sawi chhuak.

Thiem leh Zverev te hi US Open hma khan vawi kua an inhmachhawn hman, record nei ṭha Thiem zawkin ṭum sarih hnehna a chang. US Open-ah hnehna a chan zui leh tak avangin player pahnih khaikhin chuan a chungnung zawk ta hle.

World number 7 Zverev chuan, "Grand Slam champion ka ni teuh hle, ka nih lohna kha game tlemte chauh a ni. Tun ṭum final-ah chuan set thumna kha a mak ber mai, hun ṭha ka neih ka chhawr ṭangkai lo kha ka tuar.

"Tunah hian kum 23 mi ka ni a, ka tan hun ṭha a la inherchhuah ve ngei ka ring. Grand Slam final ka khelh hnuhnung ber a nih loh hram ka beisei," tiin a sawi. Zverev hi player beiseiawm berte zinga mi a ni a, dawhtheihna a ngah deuh chuan nomawi lian tham a la chawi ngei 

a rinawm.