Ropui takin England an chak

England cricket team-in ṭum danga an la tih ngai loh an ti a, nimin khan ODI match-a an run um tawh zawng zawnga an run um hnem ber umin wicket sarihin New Zealand an hneh.

Trent Bridge, Nottinghamshire-a inkhelah hian bat hmasa zawk New Zealand-in over 50-ah run 349 zet an vawchhuak a, mi pasarih an hloh. Hetiang zat target um tur England hi chak lo tura ngaih an ni tawh.

Mahse, World Cup a beisei phak lo England tan Eoin Morgan leh Joe Root te an lo dingchhuak a, Morgan hian run 113 vawchhuakin Root-a'n run 106 a vawchhuak a, ball 37 a hmachhawna run 68 vawchhuaktu Alex Hales-a'n a lo thawhhlawk ve bawk nen over 44-na lekah England-in run 350 vawchhuakin mi pathum chiah an hloh a, an target an umpha.

England hian kum 2000 khan Pakistan laka an target 306 chu an lo um pha tawh a, tun anga target tam umphak hi an la nei ngai lo.

England leh New Zealand te'n series an khelh mekah hian team pahnih hi vawi hnih ve ve an chak tawh a, series match khelh tur pakhat la awma chak zawk zawkin series hi an la dawn a ni.