Coach ka hrawn tawh zingah Benitez a ṭha ber - Pepe Reina
Bayern Munich keeper Pepe Reina chuan coach a lo hrawn tawh zingah Liverpool leh Napoli-a a boss hlui Rafael Benitez aia ṭha a la hriat loh thu a sawi.
Khawvela coach ṭha ber pawl pahnih Vicente del Bosque leh Pep Guardiola te enkawlna hnuaia khel tawh Reina chuan, "Coach ka thawhpui tawh zawng zawngah Benitez aia ṭha hi an la awm lo. Liverpool-ah khan player ka nih anga ka season hman ṭhat ber ber ka hmang a ni. Level sang thei ang berah inelna ka hmachhawn a, eng title pawh chawi tum ngam team-ah ka khel bawk a ni," tiin Benitez hnuaiah amah mai bakah Liverpool team-in an khelh ṭhat ṭhin thu a sawi.
Kum 32-a upa Spanish keeper chuan Anfield-a cham laia Premier League nomawi an chawi miah lo chu hrehawm a tih thu a sawi bawk.
Liverpool keeper rinrawl ṭhin Reina chuan Bayern-ah a beisei aia thil a harsat thu sawichhuak bawkin, "Ka beisei aiin engkim a harsa. National team-a first choice nih loh hi chu a pawm dam theih mai a, club lian taka khelha khelh phak loh reng erawh hrehawm tak a ni," tiin Manuel Neuer-a thachhang dawltu nih reng chu hrehawm a tih thu a sawi.
Season hmasa Bundesliga-a match thum chiah inlan Reina chuan, "Tun aia tam zawk hi inkhelh theih ka inbeisei a, mahse he club ka zawm tirh khan ka dinhmun tur hre lawka thutlukna siam ka nih avangin ka hnual hran lo. Bayern-ah hian contract ka la nei a, season thara match tam zawk khel thei turin ka inbuatsaih mek a ni," a ti.