Copa America Brazil leh Neymar barakhaihtu Colombia

Ningani zing khan Jeison Murillo goal hmangin Colom­bia-in Copa America group match hnihnaah Brazil an bara­khaih. Brazil captain Neymar chu hamrik hnuhnung ber a rik hnuah red card pek a ni.

Tunhnai an dinhmun leh player kan en chuan 'barakhaih' a ni hran lo maithei. Mahse, ram pahnihte hi tun hmaa vawi 28 an inkhelh tawh aṭangin Colombia hian Brazil hi competitive match-ah vawi khat bak an la hneh lo. Kum 1991 khan Copa America-ah 2-0 in an lo hneh tawh a, kum 24 hnuah inelna ngaiah Colombia an chak leh chauh.

He inkhela goal awm chhun hi Colombia central defender Jeison Murillo-a'n first half zawh hma minute kua a la awmin a khung. Colombia-in an goal khat thun hum him turin tlarhnungah Cristian Zapata leh a ṭhianten Neymar leh Roberto Firmino te chu minute 90 chhung an dang tluan thei.

FIFA World Cup 2014 zawh­ah Dunga-a'n a vawi hnih nan Brazil a enkawl ṭan a, ṭum 11 hneh lo nei loa an kal tluan hnuah Colombia-in an record duhawm tak an tihtawp sak.

Inkhel chu

An match hmasa zawka Venezuela laka mualpho Colom­bia tan chak loh nawn a thiang tawh lo. Inkhel ṭan phat aṭangin James Rodriguez kan hmu nghal, mahse a ball pet chu goal sirah uiawm takin a liam.

Season thara Chelsea zawm mai tur Radamel Falcao-a'n goal hrula a volley hnuah Jeison Murillo-a'n chance ṭha a hlah a, Colombia-in goal chance an ngah zawk.

Minute 36-naa Juan Cua­drado cross chu Brazil tlar hnungten an pet chhuah mai loh avangin ball lo dawng fuhtu Jeison Murillo chuan chiang zetin Colombia hmahruaina goal a khung.

Goal khat an phurh hnu­ah Brazil-in harhna an chang chauh. Barcelona star Neymar a langsar a, season thara Hoffenheim midfielder Firmino nen Colombia thar hnung chhaih buai mah se Arsenal goalkeeper David Ospina an paltlang thei lo.

Brazil hian hun ṭha an hmu leh a, Ospina chet sual vangin Firmino chuan an si phurh sut theihna hun ṭha nei mah se goal chungah a pet chhuak luah a, Lammuala inkhel tawh Firmino hian Douglas Costa cross chu a tauh goal thei lo bawk.

Brazil hian na takin nawr reng mah se Colombia hian counter attack aṭangin an bei let na ṭhin hle. Hun tawp hma hretin Real Madrid player Rodri­guez chuan Brazil goal­keeper Jefferson-a dan hman loh turin pet mah se ball hi goal sirah a kal hlauh.

Inkhel tawp hnuah Pablo Armero a pet per luih vangin Barcelona forward Neymar chu red card pek a ni a, he thil thleng vanga nungchang mawi lo lan tir ve tu Colombia player Carlos Bacca pawh red card pek a ni.

Neymar hrem chungchang hian sawi zui a hlawh a, Chel­sea nena sawi zawm vanga ngaihven hlawh Colombia striker Falcao-a'n beisei a la pha lo zel.

Dunga thukhawchang

Brazil manager Dunga chuan an captain Neymar hnawh­chhuah a ni chu pawi a tih thu leh a tel loa khelh dan an zir a ṭul thu a sawi.

A vawi khat nana a team te chak loh puitu Dunga chuan, "Neymar tel lo hian vawi khat chu kan lo khel tawh. Chumi

ṭum chuan Mexico 2-0 in kan hneh. Ani hi kan team tan hotupa a nih avangin kan match zawng zawngah hian tel thei sei ka duh. Amaherawh chu kan duh angin thil a kal thei vek lo fo, tunah pawh hian Neymar tel loa khelh dan kan ngaihtuah a ngai a ni mai. Inkhel kha kan thlir chuan foul a tam em em a, inkhel kha thununtu awm lo ang mai a ni," tiin inkhel enkawltu refree Enrique Osses chu inkhel thunun tawk loah a puh bawk.

Neymar a lungawi lo

Kum 23-a upa Neymar chuan referee thutlukna chu mak a tih thu sawiin, "Thu­tlukna lai lo tak a ni. Kan inkhelh chhung zawng khan vawi tam tak min petin minti tlu a, mahse yellow card pawh an hmu lo. Ka tih luih pawh ni loin ka tihpalh vangin min hnawtchhuak leh si. A mak ka tiin ka hrethiam thei lo a ni," tiin a sawi.

Brazil leh Colombia in­khelh ṭuma team pahnih foul neih zat belhkhawm hi vawi 39 zet a tling.

Colombia hian an group match hnuhnung berah Peru an khel leh ang a, Brazil hian Venezuela an hmachhawn ve thung ang. An group aṭang hian hian Brazil, Colombia leh Venezuela ten point thum ṭheuh an hmu mek.

Group A

Inrinni zing hian Group A te chuan an group match hnuhnung ber an khel dawn a, quarterfinal lut turin Mexico-in Ecuador an hneh ngei a ngai ang. Group hmahruaitu leh he tournament thlengtu Chile leh Bolivia te hi an inhneh tawk a nih chuan an pahnihin quarterfinal an lut thung ang.

Inrinni zing inkhel turte

02:30 AM Mexico Vs Ecuador

05:00 AM Chile Vs Bolivia