Aston Villa zawmtu Micah Richards

Manchester City right-back Micah Richards chuan free transfer-in Aston Villa a zawm.

Kum 26-a upa Eng­lish defender hian Aston Villa-ah hian kum li cham turin contract a ziak a, July 1-ah Etihad-a a contract a hman zawh rualin Villa Park hi a pan dawn a ni.

England tan pawha vawi 13 lo inlan ve tawh defender hi kum 2011-12 a Premier League champion team Manchester City-ah player pawimawh ber pawl a ni a, mahse City ma­nager thar Manuel Pellegrini hnuaiah duh anga hmun a chan tam loh avangin season hmasa kha Serie A club Fiorentina-ah loan-in hun a lo hmang tawh.

Tun nipui transfer-a an player lakluh hmasak ber atana Richards lalut tu Villa manager Tim Sherwood a lawm a, rele­ga­tion zone aṭanga Villa khaichhuaktu ma­nager chuan, "Richards hian he club a kan lalut hi kan tihsual lohzia min hmuh tir ngeiin ka ring a ni," a ti.

City tana match 250 lai kheltu Richards hian kum 14 leka upa a nih laiin Oldham aṭangin Manchester City a zawm a, October 2005 khan Premier League-a a match hmasa ber a khel. City-a bul a ṭan tirh lam hian a khelh ṭhat theih em avangin kum 18 leka upa nichungin 2006 khan England tana khel tura koh a ni. England squad-a defender koh tawh zingah a aia naupang an la awm lo.