Golden boot dawngtu Vardy tan goal hnih

Pathianni zan Premier League inkhelah Leicester City chuan 3-0 in West Bromwich Albion an hneh a, season hmasa top scorer Jamie Vardy chuan goal hnih a khung.

Foxes tana Vardy goal hnih lut hi penalty aṭanga a khung ve ve a ni a, nipui transfer-a an player lak thar Timothy Castagne chuan player theihna nei sang bik a ni tih pholangin goal khat a khung ve bawk. 

West Brom an tlawm ve leh tak avangin Championship aṭanga Premier League kai thar pathum chu an match hmasa berah an tlawm vek.

Baggies ang thoin Fulham pawh 3-0 in Arsenal lakah an chak lo a, Leeds United-in goal chhuah tam ber mah se Liverpool lakah 4-3 a an tlawm avangin kai thar zingah chuan beiseiawm bera chhiar theih an ni. 

Leicester-in season tawp lamah beisei an phak loh avangin Champions League an khel thei lo a, Premier League season ṭan leh a nih hnua hnehna an chang nghal thei hi an lawm khawp ang. 

Vardy tan pawh zan lawmawm a ni - English striker hi season hmasaah top scorer ni mah se a goal khung 23 zinga 17 chu Krismas hmaa a khung a ni a, season bul ṭan nana goal hnih khung hi a chhe lo. 

Season tawp lama Leicester beisei phak loh chhanah midfielder James Maddison inhliam chu puh theih a ni a, Foxes fan-te lawm nan English playmaker hi bench aṭanga luhtir a ni. 

Chelsea pantu Ben Chilwell thlak tura lut Castagne-a'n a khel ṭha takzet a, goal venhim a thiam a ni mai lo a, attacking a pui ṭha hle bawk - Luc Nilis, Thomas Vermaelen, Christian Benteke leh Leandro Trossard hnung zuiin Belgian player, Premier League match hmasa bera goal khung nghal thei zingah a hming a nem kai. 

Leicester-in hnehna an chang nghal a, Foxes tana penalty vawi hnih khungtu Jamie Vardy chu coach Brendan Rodgers-a'n a fak hle. Leicester boss chuan, "Eng team pawhin an duh ang. Player goal khung thei, tlan thei leh tlan chak em em a ni. 

"Box player a ni a, midang bum kuala tlan kual chi a ni lo a, mahse box chhungah chuan hlauhawm tak a ni. Cross aṭanga ball kal a ni emaw, penalty aṭang pawhin ni se goal khung tura theihna a nei zel - hlah tur ang hian a lang ngai lo," a ti. 

Leicester-in game ṭha tak an khelh rualin nipui transfer-ah Chilwell thlak turin Castagne an lalut tih loh player thar lakluh an nei lo tih hriat a ṭha a, Europa League khelh tur an neih bawk avangin season hmasa anga thamral an duh loh chuan transfer bazar-ah chet a ngai ang. 

Rodgers chuan, "Khel-mual piah lamah nasa takin hna kan thawk a, eng nge lo thleng dawn chu kan hre zel ang. Ka player neih sa avangin ka lawm a, player thar kan nei emaw nei lo emaw pawh ni se, he squad hi a ṭhat zual theih nan kan bei zel ang," a ti a, player thar lakluh ngei erawh an tum niin a lang.