Klopp-a thusawiin Lampard nuih a ti za

Liverpool boss Jurgen Klopp-a'n Chelsea sum hman nasat thu a sawi chungchang chu Frank Lampard-a'n a chhanglet a, Blues manager chuan, "Tlem chuan minti nui ve deuh hlek a ni," tiin Klopp-a chungchang chu 

a sawi!

Chelsea hian nipui transfer-ah player lakluh nan pound maktaduai 200 chuang an seng tawh a, hemi chungchanga an zawhna chhangin Klopp hian, "Zan khat thil thuah kan nihna hi kan thlak danglam thut thei lo a, Chelsea ang nih duha che thut thei kan ni lo," tiin a lo sawi tawh. 

Lampard chuan, "Klopp-a thusawi hian minti buai hran lo a, tlem chuan nuih erawh a ti za ve deuh a ni. An club chanchin pawh a ngaihnawm a, kum nga vel Jurgen Klopp an kawl chhungin player lakluh kawngah pawh an che fuh hle

. 

"Liverpool players hi en ula, Van Dijk, Alisson, Fabinho, Keita, Mane, Salah-te hi player ṭha tak tak, manto taka lakluh vek an ni. Club-in an tih ṭhat em em chu kum rei tak chhung coach leh a hnathawha rinna an nghat hi a ni a, thawnthu ropui tak, mahse player lei nana sum tam tak senna thawnthu ve tho a ni," a ti!

Klopp-a'n Coctober 2015 khan Liverpool a zawm a, kum 2019-a Champions League nomawi an chawi nen hemi inkar chhung hian pound maktaduai 34 man ve ve Sadio Mane & Mohamed Salah, midfielder Naby Keita (£48m), Fabinho (£39m), defender Virgil van Dijk (£75m) leh goalkeeper Alisson (£67m) an lalut. 

Mahse, Reds hian European champion an nih hnuah erawh Dutch defender Sepp van den Berg (£1.3m), Japan forward Takumi Minamino (£7.25m) leh Greece left-back Kostas Tsimikas (£11.7m) lakluh nan bak sum an seng lo thung.  

Klopp hian, "Kan tunlai khawvel thlirin thil a chiang lo em em vek a, club ṭhenkhat erawh ram leh thil ti thei tak tak thuhnuaia awm an nih avangin kan khawvel dinhmun chiang lo hian an club-ah nghawng a nei ve lem lo," tiin Chelsea hi a 

kap bawk. 

Lampard erawh insawi-fiahin, "Player lalut thei loa hrem kan nihna aṭangin ka tal chhuak a, kan harsatna kha tunah hian chinfel kan tum a nih hi. Players lakluh nan sum kan seng ngei a, tunah chuan hnathawh a hun tawh," a ti. 

Chelsea hian nipui transfer-ah winger Hakim Ziyech (£33.3m), forward Timo Werner (£48m), attacking midfielder Kai Havertz (£71m), left back Ben Chilwell (£45m) leh centre back Thiago Silva (free transfer) an lalut a, free transfer thoa an lakluh Malang Sarr erawh loan-in an chhuahtir leh zui. 

London club Chelsea hi nizan khan Brighton & Hove Albion nen an inkhel a, he thu buatsaih a nih lai hian result kan hre hman lo - September 20 zanah Liverpool nen an inkhel zui dawn a, season hmasaah Klopp leh Lampard hian buaina an lo neih tawh bawk avangin boruak a 'hot' khawp ang.