PSG an chak lo, buaina a chhuak Hnawhchhuah zingah Neymar a tel

Paris St-Germain-in Champions League final an thleng a, Ligue 1 thununtu an nih bakah Europe club ṭha ber zinga mi an ni. Season tharah erawh PSG-in Lens hneh loin bul an ṭan a, Pathianni zan khan Marseille 1-0 in an hneh lo leh bawk. 

Marseille tan hian Florian Thauvin-a'n minute 31-naah goal awmchhun a khung a, PSG hi 1984-85 season hnua a vawi khat nan Ligue 1 match hmasa pahnihah an tlawm. Inkhelh bana an sawi zui erawh result lam ni loin injury time-a buaina a ni a, player panga hnawhchhuah niin Neymar pawh a tel.

PSG-in Covid-19 positive vangin Kylian Mbappe an chhawr thei lo a, Mauro Icardi leh Marquinhos te an chhawr thei lo nen French champion hi an ṭhat theih dan berin an khel lo.

Chutihrualin PSG tan Neymar leh Marco Verratti te an inlan thei a, Italian midfielder goal khung tur chu Marseille keeper Steve Mandanda-a'n ṭha zetin a dang. Neymar pawhin goal khungna tur hun ṭha nei mah se goal zawnah a tauh thei lo.

Parc des Princes-a inkhel result tidanglamtu chu Flrorian Thauvin a ni a, minute 31-naah Dimitri Payet cross chu mawi zetin a khung. Kum 27 mi Thauvin hi Marseille aṭanga lar chhuak a ni a, Newcastle United-ah hlawhchham mah se amah chher liantu Marseille tan erawh a ṭhat ngaiin la ṭha reng.

Marseille hian November 27, 2011 hnuah a vawi khat nan PSG lakah hnehna an chang. Inkhel hmuhnawm takah hian goal khat chauh lut mah se PSG tana Angel Di Maria khung leh Marseille tana Dario Benedetto te khung chu offside vangin pawm a ni lo.

Paris Saint-Germain leh Olympique de Marseille inkhel hi Le Classique tih a ni a, sap ṭawng chuan 'The Classic' tihna niin La Liga lama Barcelona leh Real Madrid inkhel 'El Clasico' entawna an phuah a ni.

Le Classique hmasa ber chu December 12, 1971 kha a ni a, tun ṭum hi vawi 98 official match an khelhna a ni a, tun hnaiah PSG ropui ta zawk mah se tun hmain Marseille-in an thunun ṭhin. Qatari sum dawng hausa hmangin PSG an in hrosa a, tun hmain French sumdawng hausa hmangin Bernard Tapie hmangin Marseille an ropui ve thung.

Tun hnaiah Marseille tla hniam deuh mah se boruak erawh a nep lo. Covid-19 vangin entu 5000 chauhin an en thei a, a en chhunte tan hmuhnawm thlir tur a awm. French club ṭha pahnihin inkhel hmuhnawm tak an chhawp chhuah bakah hun tawp hmain buaina a chhuak a, card vawi 17 zet phawrh niin player panga an hnawt chhuak.

Injury time-ah Marseille player Dario Benedetto-a'n PSG midfielder Leandro Paredes a nawr tlu a, Parades insum zo lo inperh tho atin Benedetto a va nam thlu nghal. Boruak a ṭang nghal at a, professional player meuhin VAR a awm tih leh TV lama thlirtu an tam tih lam an ngaihtuah tawh  lo.

Paredes hian Marseille player Alvaro Gonzalez a tauh hlek a, Alvaro hi uar takin a tlu. Boruak san belhchhahin Paredes puitu Layvin Kurzawa a insum zo ta lo. Kurzawa leh Marseille player Jordan Amavi an in mal beih a, referee-in  PSG substitute pahnih Paredes leh Kurzawa bakah Marseille duo Jordan Amavi leh Dario Benedetto te a hnawt chhuak.

Referee hian TV replay a en let a, hnung lam aṭanga Alvaro khawihtu Neymar red card a pe leh bawk. Brazilian forward hian a chhuah pahin fourth official bulah 'chi leh chi inthliar a awm vang' tihin an sawi. Twitter-ah Neymar hian, "Ka inchhirna awmchhun chu a hmaia ka hnek lo kha a ni," tiin a ziak a, a chunga ṭawngkam bawlhthlawh hmangtua a puh Alvaro lakah ṭawngkam a duh tui lo.

Alvaro hian buaina ṭantirhah Angel Di Maria-a'n chil a chhak khum niin a sawi ve bawk. Argentine midfielder hi season ṭantirha PSG player Covid-19 positive zinga mi a ni a, chutihrualin tunah erawh a negative tawh thung.

Marseille boss hi Chelsea manager hlui Andre Villas-Boas kha a ni a, Portuguese manager chuan, "Football-ah chi leh chi inthliarna a awm tur a ni lo, tun ṭuma mi pawh hi chi leh chi inthliarna lam a nih ka ring lo. Thu chiang zawk kan hre zel ang," tiin a player-te chhan bawk mah se thil thlen dan a hriat chian loh avangin a ṭawng huai ngam bik lo.

Hnehna changtu AVB hian PSG boss Thomas Tuchel a kap zui. Marseille manager chuan, "Kan chak danah kan vanneih thu min hrilh a, kei pawhin Champions League quarterfinal-a Atalanta an hneh danah an vanneih thu ka hrilh. PSG hi ka dah sang a, anmahni pawh ka zah. Chutihrualin dollar tluklehdingawn 1.5 an sen chuan Champions League an chawi ngei a ngai. 

"Ancelotti a awm ṭhin a, Everton a enkawl tawh. Emery pawhin a enkawl tawh a, Villarreal a enkawl leh tawh. A awlsam lo a, an duh ber Champions League an la nghak mek," tiin a sawi.