Wolves-ah Nuno Espirito Santo a rinawm

Wolverhampton Wanderers manager Nuno Espirito Santo chuan Premier League club tan rinawmna thu a tiam a, kum thum dang khelh chhunzawm turin contract thar a ziak. 

Nuno hian a contract neih lai ang chuan Wolves-a cham chhunzawm turin kum khat chhung atan contract a la nei a, contract thar hmangin a cham chhunzawm tur thu a nemnghet ta a ni. 

Wolves chairman Jeff Shi chuan, "Nuno hi Wolves tan chuan mi danglam bik a ni a, tun hnai kum thum chhunga kan club nihphung kan din hi Nuno-a thluak aṭanga inṭan vek a ni," tiin a sawi. 

Premier League club Wolves hian nipui transfer-ah player pathum an lalut tawh a, heng zingah hian club record pound maktaduai 35.6-a Fabio Silva an lakluh chu a tel. 

Mahse, Wolves boss Nuno Espírito Santo chuan-a squad chu a nih tur ang a la nih loh thu a sawi a, "Hna kan lo thawh tawhte ni loin kan hmaa inchhawp hi a pawimawh zawk chu a ni. Inbuatsaihna ṭha nen theihtawp chhuah ang u," tiin a sawi zui. 

Wolves hian nizan dar 10:30 khan Premier League match an khel a, khualmualah Sheffield United an lenchilh - he thu buatsaih a nih lai hian result kan hre hman lo.