Verona hnehin a chung berah Napoli

Antonio Conte enkawl Napoli chuan Serie A champion nih an tum ngam tih chu a takin an lantir leh ta - Naples club hian Pathianni zan inkhelah Hellas Verona chu 2-0 in an hneh.

Diego Armando Maradona Stadium-a inkhelah Verona goalkeeper Lorenzo Montipo chuan minute ngana lekah anmahni lamah a ti lut a, second half minute 61-naah Frank Anguissa chuan an chak a nemnghet bawk.

Serie A match 20 an khelh aṭangin Napoli hian point 47 hmuin hma an hruai a, anmahni hnaih bertu Inter Milan aia an sanna chu point li a ni, champion lai Inter hian match hnihin an khel tlem thung.

Conte-a naute hian a zawnin league match vawi nga hnehna an chang ta, an hmabak chu pathumna dinhmun luah mektu Atalanta an ni dawn, kar tawpah inkhel hautak an hmachhawn dawn tihna a ni.

Verona nen an inkhelh hmain Conte-a'n a player ṭha Khvicha Kvaratskhelia chuan tun thlasik bazar chhungin Italian club chhuahsan a duh tih a sawi a, tun ṭumah pawh hian a chhawr lo, la chhuak chiah lo mah se a hmun ruak luah thei an zawn a ngai dawn niin a lang.

Inkhel dangah Inter Milan chuan Venezia chu 1-0 in an hneh, goal awmchhun hi Matteo Darmian-a'n minute 16-naah a khung a ni a, goal dang lut zui loin khualmualah point thum an hlawh chhuak.

Inter Milan manager Simone Inzaghi chuan, "Second half kan khelh dan kha a hmuhnawm danglam phian, goal khung belh ta chiah lo mah ila hlauthawng miah loa inkhel thunun theih kha a hlu.

"Player hliam leh damlo kan nei nual a, chutiang chunga Inter Milan khelh dan tur ang taka kan khelh theih avangin ka lawm," a ti. Venezia lakah hian Hakan Calhanoglu, Francesco Acerbi leh Henrikh Mkhitaryan te an inlan thei lo vek.