Khelo India Football Under 17-ah Mizoram an champion

Guwahati-a neih mek Khelo India Games-a Under 17 Boys Football-ah Mizoram chuan inelna thlengtu Assam chu 1-0 a hnehin an champion.

Mizoram hian Under 17 football inelnaah kum 2018 khan football-ah gold medal an la tawh a, nikum khan Under 21 football-ah gold medal la tawh bawkin Khelo India inelna pathumah Mizoramin football hmangin gold an la vek. Mizoram hian group stage-ah Assam an hneh lo a, Bihar an sawp avang leh Chandigarh nen an inhnehtawk avangin semifinal an lut tho. Semifinal-ah C. Lalmuanpuia penalty hmangin Punjab 1-0 in an hneh a, gold la turin Assam an hneh a ṭul - a harsa dawn tih a chiang.

Mizoramin an intawn hmasak ṭum ang thoin goal an khung hmasa a, M. Lalpektluanga'n minute 37-naah a khung. Pektluanga hian an intawn hmasak ṭum pawhin Assam lakah hian goal hnih a khung tawh a, final-ah hian petna tur khawp insiamin kawh zetin box chhung aṭangin a khung. Assam-in ṭantu an ngah a, amaherawhchu Mizoram tlarhnung khawng tak an paltlang thei lo. Mizoram manager Lalthawm-mawia chuan, "Assam kan hneh loh ṭum khan kan zuam sual a, final-ah erawh kan naute rilru put hmang a dik. Krismas leh kumthar lai pawhin kan chawl lo a, gold kan la hi kan lawm takzet," tiin Vanglaini a hrilh.

Lawmthu sawi zuiin Mamawia chuan, "Mizoram aiawha kal kan ni a, player-te hi Lungleia SYS Football Academy-a awm te an ni.  Kan tum kan tihhlawhtlin theihnana min thlawptu Sports minister, SYS-a kan hotute leh MFA-te chungah kan lawm takzet," a ti. Mizoram team hi Lalthawmmawia (manager) leh R. Lalmuankima (coach) ten an enkawl a ni.