Robben a inhliam nghal

Bayern Munich legend Arjen Robben chuan July 2019-a inkhelh a chawlhsan hnuah khelmual a rap leh ta a, mahse Dutch forward hian khelmualah minute 28 hun a hmang hman chauh tihah hliam neiin lakchhuah lehnghal a ni. 

Kum 36 mi winger hi a professional career ṭanna club Groningen chuan an club tana khel leh turin an thlem a, he sawmna hi pawmin a ball boot khai tawh hnu chu bunin Dutch league-ah a lo kir leh. 

Mahse, Chelsea leh Real Madrid tan pawha a hming lo chher tawhtu forward hian a beisei angin a lo kir lehna inkhelah hming a chher thei lo a, hliam vanga lakchhuah a nih bakah a club hlui tho  PSV Eindhoven lakah 3-1 in an tlawm bawk. 

Groningen fan-te chuan Robben hi, "I inah kan lo lawm a che, Arjen," tiin banner lian ṭha tak nen an lo lawm a, fan-ten an lawmna erawh a chhang let thei ta lo. 

Netherlands tan vawi 96 inlana goal 37 khung thei Robben hian a vanglaiin Eredivisie (1), Premier League (2), FA Cup (1), League Cup (2) leh La Liga (1) nomawi a lo chawi tawh a, a hlawhtlin berna Bayern-ah Bundesliga (8), DFB Pokal (5), DFL Super Cup (5), UEFA Super Cup (1) leh UEFA Champions League (1) nomawi a chawi bawk.