Leipzig an chak nuam sa

Pathianni zan khan RB Leizpig chuan Werder Bremen 4-2 in an hneh a, tun season Bundesliga match 16 khelh tawh aṭangin point 30 hmuin palinaah an awm.

Red Bull Arena Leipzig-ah mualneituin bul an ṭanṭha a, Xavi Simons-a'n minute 23-naah ṭha taka ball lalutin goal hmahruai a khung. Minute thum hnuah Mitchell Weiser hmangin Werder Bremen-in sut ṭhen mah se Leizpig an chungnung chhunzawm.

Barcelona leh PSG academy aṭanga inzir chhuak Simons hian minute 35-naah goal ropui a khung a, halfway line pelh hret aṭanga ball khalh pheiin box chhung chiah aṭangin mawi zetin a pet goal.

Second half ṭan chiahah Benjamin Sesko-a'n kawh pawtin box pawn aṭangin a khung a, Leipzig forward hi club lian zawkah a luh thuai a rinawm. Minute 90-naah Christoph Baumgartner-a'n chak nemnghehna goal a khung a, Bremen tan Oliver Burke-a'n injury time-ah khung bawk mah se Leipzig 4-2 in an chak.

Inkhel dangah VfB Stuttgart-in Ausburg 1-0 in an hneh. Bundesliga-ah Bayern Munich-in point 39 hmuin hma an hruai a, champion lai Bayer Leverkusen-in point liin an pha lo.