Enrique leh a naute an kang sang

Paris Saint Germain chuan Ligue 1 nomawi an kawl lai an humhim leh ngei dawn niin a lang - Luis Enrique leh a naute hian Pathianni zan khan an mikhual Saint-Etienne 2-1 in an hneh.

Parc des Princes-a inkhelah PSG tan forward Ousmane Dembele chuan goal hnih a khung a, mikhual team tana Zuriko Davitashvili-a freekick lut mawi viau mah se awmzia a nei phak tawh lo.

PSG hian hmanni lawk khan Monaco hnehin French Champions Trophy an la a, tunah chuan league lamah result ṭha an nei chhunzawm leh nghal, an boruak a fuh chho hle a ni.

Tun season Ligue 1 match 17 an khelh tawhah PSG hi an la tlawm miah lo, vawi 13 chak tawhin ṭum li dang chu an khingpuite nen an inhnehtawk thung; anmahni hnaih bertu Marseille aiin point sarihin an sang mek.

PSG manager Enrique chuan, "Kumin atan Parc des Princes bika kan match khelh hmasak ber a ni a, khatiang taka mipui thlawpna ṭha kha kan dawng ang tih ka ngaihtuah phak lo zawk hial.

"Player ṭha leh rintlak kan ngah a, tun ṭum chu Ousmane Dembele hun a ni, ni dangah chuan player dang pawh an inlar ve leh mai thei," a ti a, a naute khelh danah a lungawi tih a sawi tel bawk.

PSG hian harsa vak loin Ligue 1 nomawi chu an chawi leh maiin a rinawm, club thuneitu lam lawmna tur ber erawh a ni lo, an duh ber chu Champions League a ni, hei erawh tun dinhmunah chuan an hlat rih viau a ni.