Swiatek a talbuai duh lo

Mimal nun leh damdawi hman phal loh chungchangah harsatna a tawk a, season hmasa tawp lamah Iga Swiatek a tlahniam - tennis season bul an ṭan leh ta a, inelna lian Australian Open a match hmasa berah a buai duh lo.

Nimin zing khan John Can Arena-ah Swiatek hian first round a khel a, a khingpui Katerina Siniakova chu straight set hmangin a hneh - Polish star hian 6-3, 6-4 in hnehna a chang a, buaina lian tham a tawk lo a ni.

World number 2 Swiatek chuan, "Katerina hi tun hma aṭangin ka lo hre tawh ṭhin, singles chauh ni loin doubles match a khel pawh ka hre tawh, khingpui awlsam a ni dawn lo tih kha chu ka hre lawk.

"Set khatnaah khan a khelh dan ka zirchiang a, tihsual ka nei nual bawk. Set hnuhnung zawk kha duhthusam vek ni lo mah se, ka khelh danah khan ka lungawi," tiin a sawi, a match lehpekah chuan Rebecca Sramkova a hmachhawn leh ang.

Swiatek hi season hmasa khan thla khat chhung inkhel thei loa hrem a ni, hremna hmang zoin tennis court-ah a lo kir leh tawh a, tunah chuan nomawi a beisei ngam leh tawh ang.

A kalkawng erawh a awlsam dawn lo, final kawnga a hmachhawn theih zingah pawh - Jasmine Paolini, Elena Rybakina leh Emma Navarro te an awm dawn, kawng awlsam a ni dawn lo a ni.

Inkhel dangah Coco Gauff a dingnghet hle bawk - American star hian tun hma lama Australian Open champion lo ni tawh Sofia Kenin chu 6-3, 6-3 in a hneh a, atan harsatna lian a la awm rih lo.

Rod Laver Arena-a inkhelah Gauff hian double fault vawi kua a nei a, ama tihsual vangin a khingpui point a pe fo. Harsa vak loin Kenin chu a paltlang thei mai a, round sang zawkah chuan tihsual nei tam a pawi thui thei ang.

Kum 20 mi Gauff chuan, "Hmasawn ngaihna lai ka ngah, a langsar tak pakhatah chuan tun aia ṭha zawk khan ka service a ngai," a ti a, aces vawi 12 siam mah se, tihsual a ngah tih chu a inpawm.

Australian Open hi Gauff tan hmun ṭha tak tia sawi tur a la ni ngai lo, a thlensan ber chu season hmasa kha niin semifinal-ah Aryna Sabalenka a ngam lo, tun ṭum a match pahnihna atan chuan Jodie Burrage a hmachhawn leh dawn a ni.