Nuggets beiseina a la nung

NBA Western Conference semifinal khelh laia tla mai tura ngaih ni tawh Denver Nuggets an la tlawm duh bik lo, nimin zing khan Nuggets hian Los Angeles Clippers chu 111-98 in an hneh let ve leh.

Team pahnih hi best of seven series-ah 3-3 in an inhnehtawk mek, a tlang tur zawk chingfel turin Nilaini zing dar 6:30-ah game 7 an khel ang. A chak zawk chuan conference final-ah Los Angeles Lakers an hmachhawn ang.

Nuggets hi an tla teuh takzet, nimin zinga game 6 an khelh ṭum hian chawlhlawk laiin point 19 ngawtin an hniam zawk. Clippers lamin an ke lehlamin final an rap tawha ngaih a ni.

Amaherawhchu, Clippers hi an ṭum a fuh lo, point an neih theih loh tluan lai chuan point neih tuma an vawm ṭum 10 ngawt chu a zawnin a lut lo vek! Dinhmun derthawng taka ding tawh Nuggets lam an thawh chhuah theih phah.

Nuggets tana point 34 neitu Nikola Jokic chuan, "Keini chuan pressure kan nei ve lo, chak loh hlauhna nei loin nuamti takin kan khel. Anni lam chu chak loh hlauin an khel a, boruak a san chiah khan tihsual an ngah," tiin a sawi.