Manchester United-ah Pogba a kir dawn ta

Hun rei tak football khawvel titi an luah a, a lut dawn, lut dawn leh lo tih thawm a inrik chhawk reng a, khawthlang media-ten French midfielder Paul Pogba hmalam hun an inhriat siak a, Manchester United fan-te thinphu a reh hleithei lo - tunah erawh engkim a chiang ta.

Kum 23-a upa Paul Pogba man chungchangah Manchester United leh Juventus an inrem a, France international man zatah hian Red Devils chuan pound maktaduai 89 thehchhuah an remti - hetah hian a la tawp mai lo cheu, kum li liam taa khelh phak loh vanga Old Trafford chhuahsantu midfielder man zat hi a khelh ṭhat dan a zira la pung chho leh thei tur a ni! Pogba hian medical a nei ang a, mimal thilah inbiakna nei lehin engkim tihfel thuai a ni ang.

Real Madrid chuan kum 2013 khan Tottenham Hotspurs winger Gareth Bale lakluh nan pound maktaduai 85 an thehchhuak a, khawvel player manto ber a ni. Tunah erawh French midfielder thiamna leh Welsh forward thiamna khaikhin chi ni lo mah se a man zat aṭanga teh chuan Pogba aia sang foot-baller zingah an awm ta lo.

Hmana an duh loh kha...

France tan vawi 38 inlana goal ruk khungtu midfielder hian United tan 2011-12 season khan a match hmasa ber a khel a, season tluana a match khelh zat chu match sarih a ni. A hunlaia United manager Six Alex Ferguson chuan rawlthar midfielder hi player ṭha tak a nih thu sawi mah se hun pawimawhah a rin ngam loh zia thiltih hmangin a lantir.

Kum 2011-ah Paul Scholes a chawl a, Owen Hargreaves-a chhuak a, Darren Fletcher a inhliam bawk. Mahse, Scottish manager hian Pogba ringtawk loin Brazilian full-back Rafael chu midfield laiah a khelhtir a, vawiina United sum tam tak sen tirtu thutlukna Sir Alex-a'n a siam tih a inhre bik lo.

A hun tawn hi thlir kirin Pogba chuan, "January 2012-ah Scholes a lo kir a, midfielder dang an awm loh lai pawha min chhawr duh lotu Alex khan min chhawr dawn lo tih ka chiang a, ka tan chuan Old Trafford-a cham chhunzawm tura contract thar ziah chi a ni lo," a ti.

Hetih hunlaia kum 19-a upa Pogba hian a contract zawh rualin Juventus a pan a, Italian club hian kum 20 a la tlin loh avangin zângnadawmnan United hnenah pound maktaduai 1.5 an pe - Serie A club-ah Pogba a hlawhtlin chhunzawm a, season li chhungin league nomawi pali a chawi hman!

Manto maw?

Kum 23 leka upa nichungin Pogba-a'n Juventus tan match 178 khelin goal 34 a khung a, Champions League final a thlenpui bawk. Euro 2016 khelh zawh takah France chu final a luhpui a, Real Madrid pawhin lakluh an duh. Pogba hi player ṭha tak ni mah se a man zat a phu lo nia sawi a ni a, United manager Jose Mourinho ngaihdan erawh a ni ve lo.

Portuguese manager chuan, "Real khan Gareth Bale leh Cristiano Ronaldo hmanga world record an thai chhiat khan an lungngaiin ka ring lo. Tun hi lunghnur taka awmna chi a ni lo a, inchhuang taka awm hun zawk a ni," tiin khawvela player manto ber lakluh theih chu uanpui tham a nih thu a sawi.

Mourinho chuan sawi chhun--zawmin, "Football-ah hian enge thil mak chu ni ang? Tun season hi a danglam bik niin tunah in ngai a, kum thum hnuah in theihnghilh leh ang. Football-ah hian eng hi nge to a, eng hi nge a man tlawm? tih lam ka hre lo. Ka hriat chhun chu Pogba hi player langsar a ni tih hi a ni," tiin a sawifiah thiam hle.

Kum 20 liam ta khan Newcastle United chuan England striker Alan Shearer lalut turin Blackburn Rovers hnenah pound maktaduai 15 an pe a, a hunlaia khawvel player manto ber a ni. Tun hi British club-in Shearer hnua khawvela player manto ber an lakluh lehna chiah a ni.

Hello Pogba!

Champions League nomawi chawi inbeisei ngam Juventus-in Pogba chelh tumin contract thar an zawrh a, Champions Lea-gue champion lai Real Madrid-in chilputin an thlir bawk - mah se, France international hian Europa League khel tur Man-ches-ter United-a kal a thlang.

Mourinho chuan, "A ma-mawh zawng zawng kan nei a, kan hnena lokal a duh chhan hi kan hria a ni. He club hi a hriatsa a ni a, he khawpuiah hian a tlangnel tawh a, players a hre sa a, kan hmachhawpah hmun pawimawh chan a chak a ni," tiin Pogba-a'n Champions League khel phak lo tur club-a kal a thlan chhan a sawi.

Real boss hlui chuan thiam taka sawi chhunzawmin, "Khaw-vela player ṭha ber nih i duh chuan Barcelona emaw Real Madrid-a kalin awmzia a nei lo. Heng club pahniha Lionel Messi leh Cristiano Ronaldo te hian an dinhmun i chhuhsak an remti lo ang," tiin Pogba chuan thutlukna dik a siam niah a ngai.

Pogba thlirna

• Arsenal legend Thierry Henry chuan Pogba hi football chanchina player ṭha ber pawl a nih theih a rin thu a sawi a, Patrick Vieira-a'n Henry ngaihdan a ṭawmpui.

• United captain hlui Bryan Robson chuan Manchester City midfielder Yaya Toure leh Pogba khaikhinin 'goal ropui' khung thei tiin a sawi.

• United legend Ryan Giggs chuan Pogba hian 'engkim a nei a ni' tiin a sawi a, Real boss Zinedine Zidane-a ngaihdan chiah a ni.

• May 2015 khan Juventus coach Massimiliano Allegri chuan Pogba chu ṭul loah midfield-ah ball a keng nasa ṭhin niin a sawi a, a tihsual tam tak chu ven theih a nih thu a sawi bawk.

• Arsenal manager Arsene Wenger chuan Pogba chu player puitling ni tura insiamchho mekah a ngai a, kum 26 a tlin hma chuan a theihna tak tak hmuh a inbeisei lo.

• England striker hlui Gary Lineker chuan Pogba chu a phu tawk aia fak hlawh player nia a ngaih thu a sawi.

• United midfielder hlui Paul Scholes chuan Pogba hian a man zat phu tur khawpin a theihna a la pholan loh thu a sawi.