Inter boss thar De Boer

Serie A club Inter Milan chuan nimin khan an manager Roberto Mancini nen inhriatthiam tawnnaa an inṭhen thu an puang a, Italian manager aiawh tur hian Frank de Boer chu lakluh a ni ang. Ajax boss hlui hian San Siro-a kum thum cham turin contract a ziak dawn a ni.

Mancini hian kum 2014 khan a ṭum hnih nan Inter a enkawl a, an beisei ber Champions League erawh a hruai thleng thei lo. June thlaa Chinese company Suning-in an lei Inter hian Mancini-a'n Yaya Toure lakluh a dilna chu an lo hnawl sak tawh a, hemi hnu hian an boruak hian ṭhat lam a pan theih loh avangin manager hnain a tuar ta nge nge niin a lang.