Olympic ngamtu Michael Phelps

United States tui hleuh thiam hmingthang Michael Phelps chuan Olympic chanchina infiammi ropui bera a nih zia a pholang leh ta. Phelps, Nathan Adrian, Ryan Held leh Caeleb Dressel te chuan 4x100m freestyle relay-ah minute 3 leh second 9.92 chauh hun hmangin Rio Olympic 2016 neih mekah US tan gold medal an la.

4x100m freestyle relay intih-siakah hian pahnihna chu France niin anni hian minte 3 leh second 10.53 an hmang a, pathumna chu Australia (3:11.37) an ni.

Kum 31-a upa Phelps hian Olympic-ah gold medal 19 a lakna chiah a ni a, a pumpuia medal 23 a lakna chiah a ni bawk. A medal lak zinga 11 te chu mimal inelna aṭanga a lak a ni nghe nghe.

Kuminah hian 4x100m freestyle relay bakah nizan khan 200m butterfly-ah a inlan a, Nilai-ni hian 200m individual medly-ah tel lehin Ninganiah 100m butterfly-ah te a inlan bawk ang.

Phelps hian 2012 London Olympic zawh khan tuihleuh a chawlhsan a, 2014 khan infiamna khawvelah lo kir lehin Rio Olympic-a tel tura a tlin chiah khan American swimmer zinga Olympic-a vawi nga inlan thei hmasa ber leh awmchhun dinhmun a luah nghal.

Hmeichhe tui hleuh lamah American bawk an langsar hma-sa leh a, kum 19-a upa Katie Ledecky chuan 400m freestyle-ah minute thum leh second 56.46 chauh hun hmangin gold medal a dawng. Great Britain nula Jazz Carlin chu pahnihna niin US mi tho Leah Smith chu pathumna a ni bawk.