A vawi 90 nan Hamilton a chak

Lewis Hamilton chuan Formula 1 huangah a vawi 90 nan hnehna a chang, car intlansiakna sang bera chak hnem ber Michael Schumacher tluk turin vawi khat chak chauh a mamawh tawh, tun season chhungin a khum theih a rinawm.

Pathianni zan khan Mugello Circuit-ah Tuscan Grand Prix tlan a ni a, harsatna hrang hrang vangin intlansiak hi vawi hnih chu chawlh lailawk a ngai - buaina karah pawh Mercedes bawk an chungnung leh hle.

Pakhatna Hamilton hnungah hian a teammate Valtteri Bottas a thleng, Mercedes driver pahnih hi championship lamah pawh a chung lamah a indawtin an awm; an chesual viau a nih ngawt loh chuan a tu emaw zawk zawkin nomawi an chawi a rinawm.

Britain tlangval Hamilton chuan, "A boruak a danglam hle, ni khat leka intlansiak vawi thum nei ang mai kan ni. Valtteri khan na takin min nawr reng a, boruak lum leh uap karah harsa takin hnehna ka chang hram," a ti.

Inelna neihna hmun hi Ferrai hmunpui a ni a, Italian team hian an mualah meuh pawh beisei an phak hleithei lo. Charles Leclerc chu pariatnaah thlengin, season thara chhuak mai tur Sebastian Vettel chu a sang zual 10 zingah a tel phak hram bawk.

Formula 1 inelna hi September 27, Pathianni hian an chhunzawm leh nghal ang. Sochi Autodrom-ah Russian Grand Prix an tlan dawn a ni.