BVT midfielder Rintea an vuiliam

Pathianni khan lirthei chesualah Bethlehem Vengthlang midfielder Lalrinawma Lianhna chu a thi a, nimin khan Lungleiah vuiliam a ni.

Rintea hi H. Lalnuntluanga leh C. Biakhmingthangi te inkarah June 3, 1993 khan Christian Hos-pital, Serkawnah a piang.

Kum 2006-ah SSA Lunglei Lunglei District aiawhin Serchhip leh Aizawlah kum 14 hnuai lam inelna a hmachhawn a, kum hnih hnuah Benjamin Football Academy (Aizawl) a zawm. Red Ribbon Football 2010-ah Chanmari Veng tan khelin round of 16 an thleng a, hemi kum vek hian Pune Football Club Academy a awm turin a tling.

Pune FC-a an awm lai hian I League Under 20-ah 2012 leh 2013 khan kum zawnin an champion a, player pawimawh niin match
ṭhenkhatah chuan captain armband a hreng nghe nghe.

Kum 2014 khan MPL club Chanmari FC-ah a rawn kir a, kum 2015-ah Lunglei team hrang hrang - YPC Serkawn, Ricky FC, Bazar FC, Ramthar FC bakah Hnahthial club Peniel FC tan khel kualin May 2016 khan BVT-ah contract a ziak.

Mizoram Football Association chuan Rintea thihna vangin nimin lama BVT leh Ramhlun North FC inkhel tur chu August 10, Nilainia khelh turin an sawn.

Lunglei player Rintea ruang hi a club khelhna BVT leh MFA hruaituten a ṭul apiangah an bawisawm a, MPL club dangte leh football ngainatuten an ui thu social media kaltlangin an puang chhuak bawk.