Manchester United kutah FA Community Shield. Mourinho, Ibrahimovic ten an zia an hloh lo

Jose Mourinho-a'n Manchester United chu competitive match-ah a kaihhruai ta a, Premier League champion Leicester City hnehin FA Community Shield kawltu an ni.

Pathianni zana Wembley Sta­dium-a inkhelah Jesse Lingard chuan yard 40 vela hla aṭangin Foxes player pali bumin minute 32-naah goal hmahruai a khung a, Leicester City-in Marouane Fellaini back pass sual zarah Jamie Vardy hmangin minute 52-naah an sut. Hun tawp hma minute riat chiah a awm tawh tihin Zlatan Ibrahimovic-a'n chakna goal a tauh lut a, United kawr nen Zlatan a ropui nghal.

Champion lai

Claudio Ranieri hoten khawvel barkahaihin season liam ta khan Premier League-ah an champion a, nomawi chawi nawn tura ngaih ni tawh lo mah se an khelhdan thlir chuan thlir liam mai chi an la ni lo.

N'Golo Kante-a'n Chelsea a zawm tawh a, French midfielder thawk­rim aiah Foxes Academy chhuak Andy King rawn lutin an khelh dan phung a la ngai reng. Ranieri hote hian United forward thar Ibrahimovic chu player naranah an chhuah a, Louis van Gaal-a hun lai ang thoin United goal nawr a na tawk lo a, captain Wayne Rooney pawh Portuguese manager-in a fak viau nachungin a vanglai a pel tawh tih zep rual a ni lo.

Amaherawhchu Lingard-a goal khung danah erawh Leicester-in insiamṭhatna tur an nei a, chutihrualin an player tharte erawh an beiseiawm hle. Friendly match-a Barcelona lama solo goal khungtu Ahmed Musa-a'n inkhel thlak danglam turin theihna a nei a, kum 20 leka upa winger tlan chak Demarai Gray-a'n theihna sang tak a nei bawk.

Foxes tan mi thar pahnih midfielder Nampalys Mendy leh defender Luis Hernandez te an inlan bawk a, season liam ta ai khan an ṭha zawk hialah a ngaih theih. Chutihrualin kumin hian Premier League champion an nih avangin Ranieri hoten Champions League an khel dawn a, squad chhah ṭha tak tih tur erawh an la ni lo.

Point 40 tho

Leicester City boss Claudio Ranieri chuan, "Team ṭha tak kan hmachhawn a, season ṭan hma inkhel a la nih chauh bawk avangin kan khelh danah ka lungawi. Ka hmuh dan tak chuan penalty thlen chu kan phuin ka hria a, mah se football a nih miau avangin kan chan tawkah kan lawm a ṭul a ni," tiin hun pangngaia chak lo zawk tur niin a inhre lo.

Season thar thlirin Italian mana­ger Ranieri chuan, "Champion nawn thlir loin point 40 hmuh phawt kan tum a, kan rilru tak tak ka sawi a ni," tiin team ṭha zinga chhiar tel a duh loh thu a sawi. Foxes hian August 13 hian Premier League kaithar Hull City nen an tun season-a an league match hmasa ber tur an khel ang.

United lam

Inkhelh ṭan hmain Paul Pogba-a'n United a zawm tur thu a chiang tawh a, French midfielder hi Jose Mourinho-a'n player palina a tih ngei chu a ni. United player thar pathum dang Ibrahimovic, Eric Bailly leh Henrikh Mkhitaryan te zingah Borussia Dortmund aṭanga lakluh Armenian midfielder chiahin inkhel bul a ṭan lo. Ṭawngkam duh tui lo tak Ibrahimovic-a'n chakna goal a khung a, kum 22-a upa Ivorian defender Bailly chu man of the match a thlan a ni thung.

Chakna goal khungtu Zlatan Ibrahimovic chuan, "Official game hmasa bera kan chak hi ka ngai hlu hle a ni. Nomawi duhin kan inkhel a, ka goal khung vanga ka lawm aia nasain kan chak vangin ka lawm. Tun hi ka nomawi 31-na a ni a, hei aia tam hi ka chawi theih ngei ka beisei," tiin a sawi. Sawi zui hlawh tur ṭawngkam nei zuiin Ibra chuan, "Manchester United hi team ropui tak a ni. Teammate ṭha tak ka nei a, rilru put hmang a dik bawk. Ka club khelh tawhnaah chuan a ropui ber hial ang. United nena ka khaikhin theih chhun chu Milan chiah a ni," tiin a sawi. Swedish forward hian a club khelh tawhna zingah Ajax, Juventus, Inter Milan, Barcelona leh PSG a sawi lang tel lo!

United manager Jose Mourinho chuan, "Second half aiin first half kan khelṭha zawk a, kan fitness la
ṭhat tawk loh vang a ni. Leicester-in an player tlan chak hmanga inkhel kalhmang an thlak khan kan buai a, hmasawnna tur kan la ngah hle a ni. Kan khelh dan kha a ṭha hle ka tih chuan kan khelh ṭhat miau loh avangin dawt ka sawi tihna a ni ang a, amaherawhchu nomawi nena season bul ṭan hi a ṭha a ni," tiin hmasawnna tur an la ngah thu a sawi. United hian season khat pawh daih lo David Moyes-a kaihhruaina hnuaiah Community Shield hi an lo la tawh tih hriat a ṭha a, Pathianni khian Premier League match hmasa berah Bournemouth an hmachhawn ang.

A tawpah buaina?

Jose Mourinho-a'n a ze ngai chhuah lehin hun tawp dawna substi­tution a siam danin sawi zui a hlawh hle. Community Shield hi inelna pangngai a nih loh avangin player paruk a thlak theih a, minute 63-naa goal hmahruai khungtu Lingard thlaktu Juan Mata chu injury time minute thumnaah Mkhitaryan-a'n a thlak nawn.

Spanish midfielder Mata leh Mourinho hi Chelsea-ah buaina an neih tawh avangin ngaihven a hlawh nghal a, Portuguese manager hi technical area-ah a insawifiah a, media hmaah a thulukna siam chhan a sawi leh bawk. Mourinho chuan, "Ball an vawrh nasa dawna kan hriat avangin player te ber kan lakchhuah a ṭul a ni. Danin player paruk thlak a phal a, dinhmun sawhngheh a ṭul tawh bakah player panga kan thlak tawh avangin Mata kan thlak a ṭul a ni. Khelmual chhungah erawh a khel-
ṭha em em a, ka duh dan takin a khel a ni," tiin a insawifiah. Portuguese manager insawifiahna pawm lotu an awm nual a, transfer hun a la zawh loh bawk avangin Mata chanchin hi sawi a hlawh chho ang.

Community Shield - Number zawnga thlirna

21 : Community Shield-a United champion zat. (Vawi 17 hi a chak zawkah an ṭang a, vawi li dangah erawh an khingpui nen an inṭawm thung)

Kum 20 : Jesse Lingard-a'n FA Cup final leh a dawt chiah Community Shield-ah goal a khung. Eric Cantona (1996) hnua Manchester Untied player zinga ti leh thei hmasa ber a ni.

97 : Danny Drinkwater-a'n kumin Community Shield-ah ball a khawih hnem ber.

3 : Season thum chhung chu FA Cup champion-in Community Shield-ah hnehna an chang tawh.