Chhun dar 12-ah Lajong Vs Dinthar FC

I Day Football 2016 semifinal luh beiseina chhawm nung turin vawiin hian Dinthar FC-in Shillong Lajong an hneh ngei ngei a ṭul a, I Day Football 2011 champion mikhual team hi an match zawng zawngah an la chak vek.

Lajong coach Thangboi Singto chuan, "Semifinal kan luh chian tawh avangin Milan Basumatary ka chawlh hahdamtir anga Rammuana a rawn inlan ang a, player dang pawh ka siksawi ang," tiin Vanglaini palai a hrilh. Dinthar FC tan Milan-a tel lo tur hi thu lawmawm a nih theih rualin chanchin ṭha lo a ni thei bawk a, Assam forward aia lut tur Chhinga Veng tlangval Rammuana hian I League-ah tawnhriat a ngah zawk.

Dinthar FC tana hriat nuam lo tur chu Lajong boss Thangboi hian, "Ka khelhpui tawh zingah Zo United an la ṭha ber," tiin Vanglaini palai a hrilh. Shillong club hian Dinthar FC hnehtu Ramhlun North an hmachhawn tawh a, 4-1 hialin an sawp. Hemi ṭuma player hmuhnawm Samuel Lalmuanpuia hi tun inelnaah Lajong tan a la khel ṭha ber a, Manipur coach hian awltir a tum lo ang.

Group B-ah pahnihnaa awm mek Zo United zuan khum turin Dinthar FC-in chak an mamawh a, heng club pahnih bakah hian naktuka inkhel tur Ramhlun North-in semifinal luh beiseina an la nei bawk.