RIO olympic 2016 Del Potro lakah Djokovic a tlawm

Novak Djokovic chu Argentina tlangval Juan Martin del Potro hneh loin Rio Olympic aṭangin a tla. Serbian thiampuipa hian mittui nen court a chhuahsan.

Nimin zinga inkhel inhnehtawk leh hmuhnawm takah world number 1 Djokovic hi 7-6(4), 7-6(2) in a chak lo. Grand slam vawi 12 champion tawh Djokovic hi Olympic-ah hian champion tura rinkai a ni a, mahse a match hmasa berah a chak lo.

Kum 29-a upa Djokovic hian major title la kim tawh mah se Olympic-ah a la hlawhlting thei lo, 2012 London-ah khan pahnihna a lo ni tawh - a kum ngaihtuahin tun ṭum hi a hun ṭha hnuhnung a ni tawh maithei.

Kuminah Djokovic hi player khel ṭha tluang ber niin Australian Open leh French Open-ah a champion. Mahse, Wimbledon-ah erawh world number 41 Sam Querrey hneh loin a tla. Olympic hma khan Rogers Cup-ah hlawhlting leh mah se Rio-ah beisei a phak loh avangin ṭha taka season khar tur chuan insiam ṭhat a mamawh.

Djokovic hi chak lo mah se a khingpui ngaihtuah chuan zahna tur a awm lo, a hneh loh Del Potro hian kum 2009 khan kha tih laia an vanglai hmang mek Roger Federer leh Rafael Nadal hnehin US Open-ah a champion. Hliam vangin buai reng mah se Argentine player hi tun hnaiah a khel ṭha chho leh tawh a, Grand Slam hnuhnung ber Wimbledon-a world number 4 Stan Wawrinka hnehtu a ni.

Del Potro chuan, "Djokovic hneh kha ka inbeisei ngam lo, ka khel ṭha takzet a, a bik takin ka forehand kha a
ṭha zual hle," tiin a beisei ngam loh result a hlawhchhuah thu a sawi.

Djokovic chuan, "Tennis ka khelh leh ka hun tawn tawha hreawm ber pakhat a ni. Ka tan chuan match hmasa bera chak loh nghal hi a nain hriatthiam theih a ni lo. Chutihrualin ka tennis khelh pui, hun rei tak hliam vanga buaina nei a lo kir hnuah ṭha taka a inkhelh leh theih avangin ka lawmpui," tiin a ban rek ṭum thum ngawt an zai avanga kum khat chhung inkhel thei lo Del Potro a lawmpui thu a sawi.

Mipa singles-ah beisei loh result kan hmuh rual chiah hian double lamah pawh Great Britain innghahna Andy leh Jamie Murray te unau chu a thlengtu ram Brazilian pair Thomaz Bellucci leh Andre Sa te ṭangdun lakah 7-6 (8-6), 7-6 (16-14) in an chak lo ve bawk.