Spurs khelmualah James-a hoin Everton chak nghal

Tottenham Hotspur khelmualah transfer bazar hmang fuh Everton-in hnehna an chang nghal a, James Rodriguez telna Merseyside club hian 1-0 in Spurs an hneh. 

Everton tan Dominic Calvert-Lewin chuan minute 55-naah he inkhela goal awmchhun hi a khung a, inkhelh zawha sawi hlawh ber erawh Real Madrid aṭanga an lakluh James a ni.

Colombian attacking midfielder theihna leh thiamna enin Everton aia club langsar zawka khelh a phu tih a lang nawn a, Real Madrid duh loh player hi Premier League-a a match hmasa berah a tlangnel nghal hle. 

Tottenham boss Jose Mourinho tan erawh zan theihnghilh tlak a ni a, Portuguese manager-in league season bul a ṭanna match-a tlawm chunga bul a ṭan hmasak ber a ni. 

Everton-in Spurs khelmualah inkhel thunun mah se goal khung tur erawh chuan minute 55 an nghah a ngai a, Dominic Calvert-Lewin chuan Lucas Digne free kick aṭanga ball kal chu Toby Alderweireld leh Eric Dier ven karah zuang sangin a tauh lut. 

Kum 23 mi striker hian season hmasa Premier League-ah khan match 36 khelin goal 13 ngawt a khung a, tun season-a a match hmasa berah goal a khung leh ta - world class coach Carlo Ancelotti enkawlna hnuaiah hma a sawn zel a rinawm. 

December 2016-a Everton tana a match hmasa ber kheltu striker hian Toffees tan Premier League match 115 aṭangin goal 25-a khung tling ta a, Everton tana Wayne Rooney-a'n Premier League-a goal 25-a khung tlin chu a nihrual. 

Rooney nen huang khata dah erawh a rem lo a, Manchester United legend ni zui ta striker hian Everton tana league goal 25 khung tur hian match 98-a mamawh - hriat tel tur chu a career tir lam leh chuai tawh lamah Rooney hian Everton tan season thum a khel. 

Ancelotti-a'n an tum ber chu season thara European football khelh phak a nih thu a sawi a, transfer bazar-ah pawh Rodriguez ringawt ni loin Brazil international Allan leh Watford midfielder Abdoulaye Doucoure an lalut tel. 

Spurs lakah Italian coach-in a player lei tharte bul a ṭantir vek a, an khel ṭha hlawm hle - a bik takin James thlir loh theih loh a ni a, Colombia international hi Spurs player-ten dan ngaihna an hre meuh lo a ni ber. 

Rodriguez hian a ṭhiante khung theihna tura ngaih vawi nga zet a siamsak a, August 2014-a Alexis Sanchez hnua Premier League-a an match hmasa bera ṭhiante tana goal khungna remchang siamsak hnem ber a ni. 

Kum 29 mi Rodriguez hian vawi hnih zet chu Richarlison tan goal khungna remchang a siamsak a, Brazilian forward hi 'class' tawk se chuan Everton hi 1-0 aia tam pawha chak thei an ni hial. 

Tottenham-in Everton lakah beisei an phak lo a, chutihrual chuan goal khungna remchang nei lo tawp erawh an ni bik lo. Season hmasaa sawisel hlawh tak Jordan Pickford chuan hna ṭha tak a thawk a, Everton keeper hian Dele Alli leh Matt Doherty goal khung ngei tur nia lang chu a dansak. 

Spurs tana player langsar ber chu Son Heung-min a ni a, Kane leh Alli tan chance duhawm a siamsak - inkhel pumpui thlir erawhin Everton-in chak an phu a, Mourinho-a'n season tharah Champions League khelh phak a tum a nih chuan insiamṭhat an mamawh. 

Tlarhmaah chhuanvawr Harry Kane-a'n eng ruai a ang lo a, English striker hian Everton penalty area-ah vawi hnih chiah ball a tawk fuh - season hmasa tawp lam match thuma goal nga khungtu striker kha a ni ta lo em ni chu aw tih tur a ni. 

Alli-a'n goal khungna remchang a nei chungin Mourinho mit a tlung tawk lo tih tifiahtu chu minute 45 hnua lakchhuah a ni kha a ni a, Southampton aṭanga lakluh thar Pierre-Emile Hojbjerg pawhin an lei chhan ang takin hna a la thawk ṭha tawk lo. 

Kha aia ṭha zawka kan khelh theih kha ka beisei a ni. Kan khel ṭha lo a, ka player-te zingah khan an theihna zawng zawnga khel chhuak lo an awm niin ka hria. Kha aia ṭha zawk khan ka naute khan an khel thei tih rilru pu chungin ka haw dawn a ni. - Jose Mourinho, Tottenham boss

Kan vaiin kan lawm a, keipawh ka lawm. Kan khel ṭha takzet a ni. Ṭha taka season bul kan ṭan thei hi ka lawm a, inelna hmachhawn turin kan ṭha tawk tih kan pholang hi thu lawmawm tak a ni. Kan duhna leh thlirna a dik tawk chuan tupawh el turin kan ṭha tawk tih ka player-te khan an pholang a ni. - Carlo Ancelotti, Everton manager