A vawi khat nan Morbidelli a chak

Marc Marquez inhliam zarah rider hrang hrang tan kawng a inhawng mek a, season kal laiah chak fal an awm thei lo. Pathianni tlaia tlan zawh tak San Marino MotoGP-ah Franco Morbidelli chu pakhatna a ni.

Yamaha rider hian bike intlansiakna sang bera hnehna a chan vawi khatna a ni, tun season-ah rider pali chuan a vawi khat nen hnehna an chang tawh - nomawi inchuhna kawngka hi zau taka hawn a ni tih a chiang hle.

Season bul ṭan fuh tak Fabio Quartararo tan erawh hun lawmawm loh a thleng, vawi hnih a chetsual hnuah inelna a tlan chhunzawm ve thei lo. Pakhatna Morbidelli hnungah hian Francesco Bagnaia leh Joan Mir te an thleng ve thung.

Misano tlankawngah hian a hmunah entu 100,000 an awm ṭhin a, kuminah chuan a khata luh phal a ni lo - mi 9,970 vel bawr an pungkhawm. A khatin la lut thei lo mah se Covid-19 hnuah a hmuna entu an awm theihna hmasa ber a nih avangin chanchin ṭha a tling.

Morbidelli chuan, "Engkim mai kha ka tan chuan a fuh vek, ka tum leh suangtuah ang ngeiin hnehna chu ka chang ve ta. Ṭha takin ka tlan chhunzawm leh thei ang em tih chu a pawimawh - ka chak theih chhan chu team ka neih ṭhat vang a ni," a ti.

Ducati rider Andrea Dovizioso chu pasarihnaah thleng mah se championship lamah erawh a chung berah a awm. A elpui Quartararo-a'n point a hmuh belh ve miau loh avangin Dovizioso a chungnun phah, a sanna erawh point ruk chauh a ni.

Tualchhung tlangval, fans lamin an ṭan rawn Valentino Rossi chu palinaah a thleng. Italian legend hian MotoGp huangah a vawi 200 nana dawhsan (podium) lawn phak chin nih a tumna chu a la nghah leh rih a ngai dawn.