Villa pan tur Martinez

Arsenal goalkeeper Emiliano Martinez chuan Aston Villa a zawm dawn. Argentine keeper hian medical test a nei tawh a, he thu i chhiar meuh chuan contract a ziak fel tawh hial mai thei, pound maktaduai 20 man a ni ang.

Kum 28 mi Martinez hian 2012 khan Gunners hi a zawm, khelhna hmun a chan mai loh avangin club hrang hrang parukah loan hmanga chhuahtir a ni a, tuna Villa a pan chhan pawh inkhelh tam a duh vang a ni.

Season hmasa khan Bernd Leno inhliam karah Martinez hian Arsenal tan si ban a nghak ṭhin. FA Cup-ah a champion pui a, tun season khuh hawnna Community Shield-ah a inlan bawk.

Goalkeeper Leno a dam leh tawh a, manager Mikel Arteta-a'n German international hi a 'first choice' tur a nih thu a tichiang tawh bawk. Bench lama hun hman reng ai chuan Martinez tan khelh phakna zawn hi thutlukna dika ngaih a ni.

Tun nipui bazar chhungin Villa hian striker Ollie Watkins leh defender Matty Cash te an lo lalut tawh bawk.