Chhuantea'n Chennaiyin FC a zawm

Indian Super League club Chennaiyin FC chuan Mizo defender Lalchhuanmawia Fanai an lalut a, Manipuri right back Reagan Singh an lalut tel bawk. 

Lengpui tlangval Chhuantea chuan, "Kum khat chhung khel turin contract ka ziak phawt a ni," tiin Vanglaini a hrilh a, Chhuantea hian ISL-ah Mumbai City leh Pune City tan a khel tawh a, season hmasa khan Odisha FC tan a khel. 

India tana vawi li inlan tawh Chhuantea hian Punjab club ṭha JCT aṭanga a career ṭanin Shillong Lajong leh Bengaluru FC tan a khel tawh bawk a, Bengaluru tan hian Federation Cup leh I League nomawi a chawi hman. 

Chhuantea ruala Chennaiyin zawmtu Reagan Singh hian Royal Wahingdoh-ah a career ṭanin Salgaocar, Mumbai FC leh NorthEast United-ah a lo khel tawh bawk a, season hmasa kha Highlander tan a khel a ni.