Footballer manto ber Paul Pogba

Manchester United chuan khawvel player manto ber ni turin Paul Pogba an lakluh thu nimin zing dar 5 khan an puang. Kum 23-a upa midfielder hian kum nga chhung atan contract a ziak a, kum khat dang pawhsei theih dan a la awm bawk.

Manto ber

Paul Pogba hian kum 2012 khan Manchester United aṭangin pound maktaduai 1.5 (zângnadawmna) lekin Juventus a zawm a, Old Trafford-a let leh tur hian English club-in pound maktaduai 89 (€105m) an seng. French midfielder hi a chetṭhat dan a zirin United-in Italian champion hi pound maktaduai 4.5 (€5m) an pek belh theih dan a awm bawk.

Player man dik tak hi club-in an puang zar ngai meuh lo a, hei vang hian khawtlang media-ten a man bawr vel an rin dan an ziak mai ṭhin. Tun ṭuma Pogba man Vanglaini tarlan hi BBC aṭanga lak a ni a, hmun ṭhenkhatah chuan French midfielder mana United pawisa sen zat hi pound maktaduai 93.2 (€110m) tihte pawhin an ziak.

Pogba hmaa khawvel player manto ber chu Gareth Bale niin kum 2013 khan Wales forward hian Tottenham Hotspurs aṭangin Real Madrid chu pound maktaduai 85-in a zawm. French midfielder-in United a zawm dawna zawhna awm chu 'a man a phu em?' tih hi a ni a, tunah rih chuan he zawhna hi inhnialna mai a la ni rih. Khawvel player manto ber Pogba tih erawh hnial buai theih miah loha thuchiang a ni ta.

Hman leh tun

Manchester United a zawm hmain Pogba hian theihna sang tak a nei tih a lang tawh a, French club Le Havre academy-a a awm laiin a captain-na hnuaiah France U16 team chu Aegean Cup leh Tournoi du Val de Marne-ah te a champion pui tawh bakah 2010 UEFA European U17 Championship-ah player pawimawh a ni bawk.

Kum 2009-ah Pogba hian Manchester United a zawm a, 19 February 2011-ah FA Cup fifth round-a non league club Crawley Town an hmachhawn ṭumin squad-a tel turin Sir Alex Ferguson-a'n a ko a, jersey no. 42 haktir a ni. Kum 18-a upa Pogba hi bench-ah a ṭhu tluan a, hemi season hian senior team tan koh ni tawh loin FA Youth Cup-ah United a champion pui thung.

2011–12 season-ah Ferguson chuan senior team-ah sawn chhoin United boss chuan, "Pogba hi khelhna hun ka pe lo a nih chuan a contract a tawp hnaih avangin min chhuahsan mai ang. First team-ah khelhna hun kan pek a ṭul a, chumi tur pawh chuan theihna nei a ni," tiin a sawi nghe nghe.

United manager ropui bera sawi theih Sir Alex hian fak viau mah se khelhna hun a pe tam tawk lo. Kum 19 leka upa midfielder hlawh atana Ferguson-a pek phal zat a tam loh avangin Pogba hi a agent Mino Raiola-a'n hminin Juventus lamah a insawntir a, Scottish manager chuan Pogba agent nen hian 'ui leh kel thlun pawlh' ang mai an nih thu a sawi nghe nghe.

Amaherawhchu Juventus-in Pogba hi an ring a, kum li chhungin Serie A title a lakpui vek a, hei bakah hian Coppa Italia leh Supercoppa Italiana vawi hnih a lakpui bakah UEFA Champions League-ah pahnihna a nih pui bawk. Ram lamah Pogba hian France chu kum 2013 khan FIFA U20 World Cup-ah champion puiin Golden Ball a dawng a, 2014 FIFA World Cup-ah ram tan khelin Best Young Player-ah thlan a ni bawk. Euro 2016 neih zawh takah France champion zo lo mah se Pogba hoin Les Bleus hi an ramah pahnihna an ni.

France midfielder Pobga man hi kum li chhung lekin pound maktaduai 1.5m aṭangin pound maktaduai 89-ah a kai chho hman a, Sir Alex Ferguson hi pawi khawihtuah a ngaih theih. Chutihrualin Scottish manager khan Pogba hi chelh ta se Cristiano Ronaldo ang thoin Real Madrid emaw club lian dang a zawm thei a, thiamna lamah tun dinhmun ang hi a thleng thei lo bawk.

Mahni ina let

Manchester United-in Pogba hian Ivory Coast defender Eric Bailly, Sweden striker hlui Zlatan Ibrahimovic leh Armenia forward Henrikh Mkhitaryan te an lalut tawh a, French midfielder erawh a dang. United tan Pogba hi mi thar a ni lo a, fapa tlanbo ang maia mahni chenna hmuna let lehah ngaih a ni thung.

Kum 23-a upa Pogba chuan, "Chawlh hman hnua mahni ina rawn let leh ang mai ka ni," tiin Juventus chu chawlh a hmanna hmun a nih thu a sawi a, United chu a chenna in ang maia a ngaih thu a sawi.

Khawvel footballer manto ber Pogba chuan, "United-a ka let thei hi ka lawm a, Jose Mourinho nena thawh dun hi ka châk tawh hle. Juventus-a ka hun tawn zawng zawng kha nuam ka ti a, ka player pui ṭhiante anga ka ngaihte nena ka thil tawn kha a ropui ka ti. Tunah erawh Old Trafford a ka let a hun tawh, helai hmun hi ka hlawhtlinna tur hmun a nih ngei ka beisei," tiin Manchester United chu hlawhtlin pui ngei a tum thu a sawi.