RIO olympic 2016 Rio-ah Nadal a inlar

Rafael Nadal chuan a banrek na a dam tawh tih Rio Olympic-ah a lantir. Spain tlangval hian a single match hmasa berah Argentina aiawhtu Federico Delbonis chu darkat khat leh a chanve tling lo deuhah 6-2, 6-1 in a hneh.

Grand Slam vawi 14 champion tawh Nadal hian kum 25-a upa Del-bonis hi a ngam hle a,
ṭum thum an intawnna niin heng aṭang hian game 11 chiah a la hloh a ni. 2008 Beijing champion Nadal hi kuminah hian single bakah doubles leh mixed doubles-ah te a inlan ang.

World number 1 hlui Nadal hi hliam vangin a buai fo a, a inkhelh chhunah beisei a phak loh ṭhin bawk avangin tun dinhmunah ATP ranking-ah pangana a ni hram. French Open-ah ban rek na vangin a inhnukdawk a, Wimbledon a khel lo zui bawk. Mahse, tunah chuan a dam tawh tih a hmuh theih a, hard court-ah ṭha takin a inkhel thei.

Inkhel dangah a match hmasa bera Novak Djo-kovic hnehtu Argentine Juan Martin del Potro-a'n a khelh ṭhat chhunzawm zel a, Portugal tlangval Joao Sousa lakah 6-3, 1-6, 6-3 a hnehna changin third round a lut. World number 2 Andy Murray pawhin first round a lo paltlang ve tawh bawk.