Atletico Madrid striker thar Luis Suarez

Barcelona duh loh Luis Suarez chuan Atletico Madrid a zawm dawn ta a, Barcelona hian an hmelma club a kal phal lo zet mah se Uruguayan striker kawng hi an dal thei ta lo. 

He thu buatsaih lai hian Suarez-a contract rei zawng tarlan a la awm lo a, Atletico Madrid lam hian Liverpool striker hlui an lakluh thu hi official taka puanzarna an la nei lo a ni. Suarez hi a tirah chuan Juventus nen sawizawm zet an ni a, mahse Italian champion hian European player ni lo an squad-a an neih belh theih loh avangin Suarez hian Italian passport a mamawh. 

Kum 33 mi striker hian Italian language test thlengin nei tawh mah se passport nghah chhung hi a rei dawn avangin Juventus an inhnukdawk a, Atletico Madrid tan lawmna a ni. 

Suarez hian Barcelona-ah kum khat chhung atan contract a la nei mek a, tun season-ah hian Catalan club tan 60% match a khelh tlin chuan a contract hi la pawhsei leh bawk tur a ni. 

Mahse, Barca coach thar Ronald Koeman-a'n Suarez-a mamawh loh thu a tichiang a, European football-a striker 'hot' ber pawl la ni reng hi a thlawna chhuahtir an phal - an elpui club-a zawm loh chuan!

Atletico-a a kal dawn miau avangin Barca hian Suarez hi a thlawn tawpa chhuahtir an remti leh lo a, a man erawh a la tlawm hle thung. Barca hian a tam berah Suarez man aṭangin euro maktaduai li bak an hmu lo ang. 

Barca-in Suarez man atana sum an hmuh tur hi Atletico lama Uruguayan striker chet ṭhat danah a innghat tel dawn bawk a, Champions League khel tura an tlin leh tlin loh thlengin en tel a ni dawn. 

Suarez hian Barcelona-ah kum khat chhungin euro maktaduai 30 bawr vel a hlawh a, Atletico-ah hian Nou Camp-a a kum khat hlawh chanve ang bak a la dawn lo - euro maktaduai 15 a hlawh dawn tihna a ni a, footballer hlawh hnem ber pawl a la ni dawn tho. 

Atletico Madrid-in Suarez an duh thu an tihchian khan Barca president Josep Maria Bartomeu chuan La Liga lama an elpuia kal hi a phal lo a, Suarez-a tana club zawm theih lo a siam sa Real Madrid, Manchester City leh Paris Saint-Germain zingah Atletico a telh belh. 

Mahse, Suarez a lungawi bik lo. Barcelona thuneitute chet dan avang hian Suarez aiawh te leh Catalan club-a hotute hi an indawr a, a tawpah Barca hi a tlawm zawkah ṭangin Suarez-a kalkawng dal lo turin an inhnukdawk. 

Barcelona tana a hnathawhte thlirin Suarez chunga Barca chet dan hmasa zawk hi dem tu an tam a, Suarez aiawh te an hmuh hnua an tlawm chhan hi Uruguayan striker-in media hmaa Barca laka a lungawi lohna puan a tum thu a sawi vang a ni!

Kum 33 mi ni tawh mah se Suarez hian season hmasa khan inelna hrang hranga match 36-a khelh aṭangin goal 21-a khung a, assist vawi 12-a la nei cheu - Barca-in an duh loh zinga an telh pawh hi thilmak a la tling. 

Kum 2014 khan Liverpool aṭangin Barcelona hi pound maktaduai 74-in a zawm a, La Liga leh Copa del Rey-ah vawi li champion-in Champions League leh FIFA Club World Cup nomawi a chawi bawk. 

Barcelona tana Lionel Messi leh Neymar nena an inkawp chu football khawvela tlarhma inkawp fuh an sawi apianga lam hmaih loh tur a ni a, 'MSN' vanglai kha dang thei an awm meuh lo. 

Barca-ah kum ruk a cham chhungin inelna hrang hrangah match 283 khelin goal 198-a khung a, Catalan club chanchina goal khung hnem pathumna record a siam hman - a nep lo hle.