Manager inbeihna a hautak dawn - Wenger
Arsenal manager Arsene Wenger chuan kum dang zawng aiin Premier League a hautak zawk dawn thu leh khawvel pum huapa manager langsar in-beihna a nih dawn avangin inelna awlsam a nih dawn loh thu a sawi. French manager hian khemual chhunga pawimawh berte erawh ball a taka pettu player-te an nih thu a sawi tel bawk.
Season thar thlirin Wenger chuan, "Jose Mourinho chu Man-chester United-ah a awm, Chelsea-in Antonio Conte an neih bakah Pep Guardiola-a'n Manchester City a enkawl dawn - Liverpool manager hming pawh Jurgen Klopp a ni," tiin a elpui tur manager-te hming hraw zia a sawi.
Premier League-a manager hna ngai chelh rei ber chuan sawi chhunzawmin, "Mi zawng zawngin kumin chu Premier League-ah beisei an nei sang dawn a, tunhma lama an lo la tawn ngai loh thil danglam leh
ṭha hmuh an inbeisei. Media lam hian manager an sawi langsarin an dah chungnung viau a ni thei, a pawimawh ber zawk chu khelmual chhunga player-te an ni a, anni hi point sual chhuaktu an ni," a ti.
Chelsea-in Antonio Conte an nei thar a, Italy manager hian Juventus a enkawl laiin Serie A-ah champion thei manager a nih zia a lantir tawh. An ram team a enkawl laiin major tournament-ah champion lo mah se player hliam ngah tak chunga Euro 2016-a champion lai Spain an hneh dan tur a ruahman dan aṭang khan thluak ṭha bik a neih zia a chiang bawk.
Team enkawl tura duhthlang thei dinhmunah ding ni ila Pep Guardiola aia thlan tur dang an awm chuang kher lo ang. Man-chester City manager chanchin hi inhrilh nawn ngai loa hriatsa vek a ni. Guardiola hian Barcelona chu champion theihna zawng zawnga a champion pui hnuah Bayen Munich chu Bundesliga-ah a zawnin ṭum thum a champion pui. Tunah a player duhzawng la khawm chungin Champions League nomawi duh City tan a theihna a lantir dawn.
A kalna lama pianga cham-pion ṭhin Mourinho neih hi Man United fan-te tana thlamuanpui tham a ni. Chelsea, Real Madrid leh Inter Milan-a player langsar lo enkawl tawhtu hian Old Traf-ford-ah khawvela player manto ber Paul Pogba a lalut leh tawh. Portuguese manger hi champion tura beisei ni mah se a hna hmasa tur chu Champions League khelh phak a ni ang.
Premier League club zinga Europe-a sulhnu nei ṭha ber hi sawi hmaih theih an ni lo. German manager Klopp-a kaihhruai Reds hian season hmasa khan beisei phak lo mah se an elpui club lian dang hneh thei an ni. Lionel Messi a khelhna Barcelona 4-0 a sawp thei club enkawltu hi Borussia Dortmund a enkawl laia German champion Bayern Munich hneha German Super Cup chawi thei a ni - player-te a fuih phur thiamna hi an chhawr ṭangkai ṭhin.
Kum 66-a upa Wenger chuan, "Tu pawhin chetṭhat kan duh vek dawn a, a ngaihnawmin a bengvar thlak ang. A tir aṭanga kan hriat reng tur chu team pakhat chauh tan nomawi dah a ni a, a hautakin kum dang zawng aiin a harsa ang tih ka ring," a ti.
'Premier Leage Big Four' tia an sawi ṭhin - Arsenal, Man-chester United, Chelsea leh Liverpool te hi an player neih leh manager en chuan league champion thei an ni. Tun dinhmuna player leh manager nei ṭha bera ngaih Manchester City an awm bawk avangin season thar lo awm tur hi a nghahhlelhawm a, a hmuh-nawmin a ngaihnawm bawk ang.