MPL atangin India team-ah David
Bhutan nena practice match khel tur India chuan Thawhṭanni khan Bhutan khawpui Thimphu an thleng a, August 13-ah FIFA ranking-a 192-na ram nen hian an inkhel ang.
Ṭum dang zawng aiin India team zinchhuak hian Mizote ngaihven a hlawh - a awm lo hran lo, India senior team player 20 zin chhuak zingah hian Mizo player pali an tel a, Mizoram football chanchina India senior squad-a Mizo an tel tam ber ṭum a ni.
India squad-ah hian ṭum dang ang bawkin Jeje Lalpekhlua a tel a, Hnahthial tlangval bak-ah hian Shillong Lajong midfielder Isaac Vanmalsawma, NorthEast United tana khel tur Lallianzuala Chhangte leh Aizawl FC captain hlui David Lalrinmuana te chu Bhutan hmachhawn tura koh an ni.
Mizoram Premier League chhulchhuak tih ngam David Lalrinmuana'n season hmasa I League-a a khelh ṭhat chhawr
ṭangkaiin ISL club Mumbai City a zawm a, India senior squad-ah hial koh a ni ta.
Chawlh tum lo David
Season hman zawh tak I League-a match li lai 'man of the match' ni thei David Lalrinmuana tan kumin hi kum ṭha bik a ni a, inchhuanpui tham a ni. Mahse, Zemabawk North tlangval hian duhtawk mai a la tum lo a, hmasawn tura inbuatsaih zel a tum thu Vanglaini palai a hrilh.
Mohun Bagan Academy-a awm laia Manchester United Academy lama goal lo khung tawhtu midfielder chuan, "India tana khel tura koh ka ni a, a phurawm thlawt a ni. Ka tan chuan engkim hi thil thar vek a ni a, training uluk taka neih niin GPS hmangin kan speed teh a ni a, engtiklai pawh in inthlahdah a thiang lo. Hmasawnna tur ka la ngah em em a, hetah hian tawp mai ka tum lo. Chumi tur chuan theihtawp ka chhuah chhunzawm zel dawn a ni," tiin Vanglaini palai hnenah a sawi a, a thlen chinah a la duhtawk lo.
David chuan Bhutan nena an inkhel tur thlirlawkin, "Inkhel bul kan ṭan leh ṭan loh chu coach-te thu thu a ni a, engmah sawi chian a la awm lo. Engkim hi theihtawp chhuaha hmachhawn ngai vek a ni a, ka tan chuan chona thar duhawm tak a ni. Senior team-a lo awm tawh sa ten tlangnel takin min kawm a, team boruak pawh a
ṭha em em a ni," tiin India team-a awm chu nuam a tih thu a sawi.
Jeje-a phur
Bhutan-a zin chhuak India player zingah goalkeeper Subrata Pal chu India tana vawi 64 inlan tawh niin a inlan hnem ber a, DSK Shivajians goalkeeper tih lohah chuan India tana vawi 36 inlan tawh Jeje Lalpekhlua hi ram tana inlan hnem ber a ni.
India tana goal 15 khung tawh striker chuan, "India senior team-a Mizo kan tam ber ṭum a ni a, a phurawm dan a dangdai khawp mai. Hei aia tam zawk hi India squad-ah hian kan la awm ka beisei a, North East aṭanga player an koh zat ringawt hi pakua kan ni," tiin Vanglaini palai hnenah a sawi a, a phur hle.
Indian Footballer of the Year dinhmun chelh mektu striker chuan Mizo player-ten hlawkna an chhar ngei a beisei thu sawiin, "Training naah pawh ka Mizo player puite an thawkrim a, training dan leh game-ah pawh hlawkna nasa zawk an chharchhuah ka beisei a ni," a ti.
Chennaiyin striker chuan an hmachhawn tur Bhutan chungchang sawi nghalin, "An ram league khel lai mek an ni a, player pawh an in fit tlang khawpin ka ring. Keini hi chawlh hmang zo training zawm tura koh kan ni a, match pangngai kan la khel lo a, sawilawk a harsa," tiin Bhutan chu hneh sa an nih loh thu Vanglaini palai a hrilh.
India captain Sunil Chhetri chu a club khelhna Bengaluru FC-in AFC Cup quarterfinal an khelh dawn avangin squad-ah koh a ni lo a, Mizo tlangval hi captain ni tura rinkai ni mah se season ṭha tak hmang zo hlim striker chuan inkhelh dawnah chauh engkim a chian tur thu a sawi.