Hammers player manto ber Ayew

West Ham chuan an club chan-china an player manto ber ni turin Andre Ayew chu pound maktaduai 20.5-in Swansea City aṭangin an lalut a, season li chhung atan contract an ziahpui. Hammers hian kum 2013 khan Andy Carroll chu an club chanchina player manto ber ni turin pound maktaduai 15-in an lo lalut tawh a, English striker man zat hi Ayew hian a khum ta a ni.

Ghana international hian June 2015 khan Marseille aṭangin Swan-sea hi free transfer-in a zawm a, Premier League-ah goal 12 khungin Welsh club tan season hman zawh takah khan ani aia goal khung hnem an awm lo.

Kum 2011-a BBC African Player of the Year dinhmun lo luah tawhtu Ayew chuan, "West Ham hian tum sang tak an nei a, manager ropui tak an nei bawk. Kumtinin hmasawn an tum a, stadium thar leh training ground thar neiin hmachhawp ropui tak an nei mek. Hmasawn zel tuma ke an penna kawngah hian tel ve ka duh a ni," tiin Hammers a zawm chhan a sawi.

Nipui bazar-ah West Ham-in player panga an lalut tawh a, Ayew hma hian Borussia Mon-chengladbach midfielder Havard Nordtveit, Valencia winger Sofiane Feghouli leh Manchester United striker Ashley Fletcher te chu free transfer vekin an lalut a, pound maktaduai 6 man defender Arthur Masuaku an lalut tawh bawk.